Barn skadd – hang fast med startnummeret rundt halsen

I ei pressemelding skriv skisenteret at ulykka skjedde måndag rundt klokka 17.00.

Blei hengande fast med startnummer rundt halsen

Ulykka skjedde i tilknyting til eit barneskirenn i alpinanlegget.

Til avisa Driva seier dagleg leiar Helge Røv at barnet ramla av heisa ved mast åtte, og blei hengande fast med startnummeret rundt halsen opp til mast elleve.

– Der køyrde barnet og det andre barnet som var med heisen, inn i sikkerheitsnettet, som automatisk utløyste nødstopp, fortel Røv til avisa.

Han meiner det tek 2–3 minutt å køyre heis mellom dei to mastene.

Barnet fekk raskt helsehjelp, og blei frakta til St. Olavs hospital med helikopter.

– Sikkerheitssystemet fungerte

Skisenteret skriv i pressemeldinga at sikkerheitssystemet fungerte som det skulle og stansa heisa med naudstopp.

– Tilsette og personell i anlegget responderte raskt, og luftambulanse frakta personen til sjukehus, skriv dei.

Kommunens kriseleiing, og kriseteam blei kopla på saka, og hendinga er rapportert til både politiet, Statens Jernbanetilsynet og Havarikommisjonen.

Skisenteret er eigd av Surnadal kommune, og ordførar Hugo Pedersen seier at dei i dag har fått beskjed frå politiet om at det ser ut til å gå bra med barnet.

– Det er det viktigaste, og det er eg veldig glad for, seier han.

Han er også glad for at politiet no granskar saka, slik at dei finn ut om noko er gale med sjølve heissystemet.

– Skisenteret er veldig viktig for bygda, og mykje brukt. Difor er det viktig for oss at alt er i orden, seier han.

Opprettar undersøkingssak

Politiadvokat i Møre og Romsdal politidistrikt, Sander Brink, stadfestar at dei har fått melding frå St. Olavs hospital om at barnet er medvite og utanfor livsfare.

Dei har no oppretta ei undersøkingssak, for å finne ut om det er grunnlag for å mistenke nokon for ei straffbar handling.

– Det går føre seg undersøkingar på staden for å avklare hendingsgangen. Vi ønsker å vite meir om kva som har skjedd og korleis det har skjedd, seier han.