700.000 liter dyremøkk trugar nærliggande vatn

Både brannvesen og politiet reiste i dag ut til eit gardsbruk i Gjesdal etter melding om ein gjødselkjellar som hadde kollapsa.

Ingen dyr eller personar skal ha blitt skadd.

Fleire jobbar med opprydding

Det er endå ikkje avklart korleis kjellarstrukturen har kollapsa.

Politiet har no kopla på kommunen i arbeidet med opprydding av dei fleire hundretusen literane med dyremøkk.

Noko av gjødsel skal ha spreidd seg til det nærliggande Limavatnet.

– Eg kan ikkje seie kor alvorleg det er, men det som vi er bekymra for er dyrelivet, for vi vil ha minst mogeleg ut i vatnet, seier innsatsleiar frå brannvesenet, Petter Valvik.

I innleiande fase blir det arbeida med å avgrense utsleppa frå kjellarkollapsen.

– No vil vi halde fram med å rydde opp her også skal vi i kontakt med kommunen og Statsforvaltaren om kva vi skal gjere vidare, seier Valvik til NRK.

Kommunen stiller med gravemaskinar

Kommunalsjef for Kultur og Samfunn i Gjesdal, Hilde Gunn Bjelde, seier at dei no er på staden saman med brann- og redning.

– Vi er der no med gravemaskin for å prøve å demme opp mot vatnet.

Det blir no gjort løpande vurderingar på om dei skal lense for å beskytte det nærliggande vatnet.

– Gjødsel oppfører seg på ein litt annan måte enn olje, held ho fram.

Ho seier dei no har løpande kontakt med forureiningsstyresmaktene, statsforvaltar, mattilsyn og brannredning.

– Vi gjer løpande det som er nødvendig å gjere for å prøve å forhindre forureining i størst mogleg grad, avsluttar ho.