Paltrow møter kraftig storm etter Israel-støtte i ny video

I ein ny, påkosta reklamefilm promoterer skodespelaren og livsstilsgründaren bustadprosjektet «51 Park» i den israelske kystbyen Herzliya.

Det rapporterer den amerikanske nyhetskanalen CNN.

Viser dagen sin

Reklamefilmen er spelt inn i New York,

Den viser Paltrow som vaknar i ei luksusleilegheit, tek seg ein joggetur og gjer seg klar for dagen.

– Det er ein grunn til at dei mest ikoniske bygningane i verda ligg ved ein park, seier Paltrow i videoen, før ho ber sjåføren sin om å køyra henne til «51 Park».

– New York?, spør sjåføren.

– Herzliya, Israel, svarar Paltrow med eit smil.

Dyre hus

Det eksklusive bustadprosjektet, som består av to 51-etasjars tårn like nord for Tel Aviv, blir utvikla av det israelske eigedomsselskapet Aviv Melisron.

Leilegheitene og penthouse-leilegheitene i komplekset skal ha ein prislapp på opptil 10 milliardar dollar – nærmare 110 milliardar norske kroner.

Lanseringa har ikkje dess mindre utløyst ei bølgje av kritikk på plattformer som X (tidlegare Twitter) og Instagram.

Mange reagerer sterkt på timinga, og skuldar stjerna for å vera politisk blind i lys av den pågåande krigen i Gaza.

Får kritikk

Blant dei som har reagert offentleg er gravejournalist Carole Cadwalladr. Ho skriv blant anna:

«Ville gjerne ha vore ei flue på veggen i strategimøta bak avgjerda til merkevara Gwyneth Paltrow om å reklamere for eit israelsk eigedomsselskap å selje ei luksusblokk i byen kalla opp etter faren til sionismen»

Kritikarar og pro-palestinske aktivistar kallar reklamen «tonedøv» og skuldar Paltrow for å bidra til å legitimera det dei beskriv som ei okkupasjonsmakt.

Fleire peikar også på at Herzliya delvis er bygd på landområde knytt til den palestinske landsbyen al-Haram, der innbyggjarane vart fordrivne under krigen i 1948.

Støttar Israel

Medan kritikken stormar i sosiale medium, forsvarar det israelske reklamebyrået Why Worry valet av Hollywood-stjerna.

– Gwyneth er ein av få A-kjendisar som har vore tydeleg i si støtte til Israel, og som offentleg har omfamna sine jødiske røter, uttalar ein talsperson frå marknadsføringsteamet til israelske medium.

Prosjektet får også ros, blant anna på Linkedin.

Paltrow er gift med den jødiske TV-produsenten Brad Falchuk.

Ho har tidlegare markert støtte til Israel etter Hamas-angrepet 7. oktober 2023, og har engasjert seg for dei israelske gislane.

CNN har vore i kontakt med managementet til Paltrow, som førebels ikkje har svara på førespurnadene frå kanalen om ein kommentar til saka.