Noregs andre sceneprøve i Eurovision: – Skikkeleg kongebra

Søljer som har blitt stolne. Hasteoperasjon i tanngarden. Ting har ikkje gått på skjener for Noregs bidrag, men i dag gjekk heldigvis alt etter planen da Kyle Alessandro hadde sin andre sceneprøve i vertsbyen Basel.

– Det gjekk skikkeleg kongebra i dag, seier Mads Tørklep, som er leiar i den norske delegasjonen.

– Kyle er ein helt og gjennomførte med glans. Han kjem godt gjennom kameraet, og eg trur han vil sjarmere Europa med sitt sjarmerande vesen, legg Tørklep til.

Har veldig trua

Oppladinga har derimot ikkje gått heilt som planlagt. Etter den fyrste sceneprøva på søndag måtte 19-åringen få visdomstanna si hasteoperert etter infeksjon i tannkjøtet.

– Ein dramatisk situasjon for det norske Eurovision-teamet i Basel, sa leiar i delegasjonen Mads Tørklep på det tidspunktet.

I dag er Tørklep meir optimistisk:

– Eg har veldig trua etter i dag.

– Forma hans er også betydeleg betre og han er «back in business» som den krigaren han er, fortset Tørklep.

I år går den internasjonale finalen føre seg i Basel, nærmare bestemt på konsertstadion St. Jakobshalle, der over 12. 000 publikummarar skal heie fram Europas neste Eurovision-vinnar.

Før den tid er artistane fordelt på to semifinalar som går føre seg 13. og 15. mai.

«Bromance»

Mange som har følgt med på Eurovision og dei ulike bidraga denne vinteren har kanskje også fått med seg at Kyle Alessandro og artisten Parg (Pargev Vardanian), som representerer Armenia, har nesten prikk like kostyme.

Både Kyle Alessandro og Pargev Vardanian frå Armenia har på sosiale medium kommentert og laga humor på at dei har like kostyme.

På ein video på Instagram tøysar dei med at dei ein gong for alle skal avsløre kva dei kjem til å gjere:

– Mange, spesielt fansen, er nysgjerrige på kva Parg kjem til å gjere med sitt kostyme. Vil han endre på det, eller ikkje? Det er det ingen som veit bortsett frå meg, seier Kyle Alessandro.

– Eg har lova å ikkje seie noko, legg han til med eit lurt smil.

Endring av kostyme

Alessandro kan derimot avsløre at han sjølv har gjort nokre få justeringar. Han tok NRK med på kostymeprøver før avreise til Basel.

– Vi har beheldt rustninga, men har gjort ho større og gitt ho meir identitet. Mellom anna har vi fått på ei halssølje og min mors favorittstein, seier 18-åringen.

– Ideen om å inkludere søljer kom fram då eg ville ha med eit visuelt uttrykk som reflekterer kulturane mine, legg han til.

Kyle Alessandro er frå Steinkjer, men er også halvt spansk.

Fråstole søljene

I utgangspunktet skulle Kyle Alessandro bruke ei trøndersølje som han hadde fått av mormora si. Men desse vart stole for tre veker sidan, da han var i Madrid i forbindelse med ein konsert med Keiino.

– Det var skikkeleg leit, fortel han.

– Det var trøndersøljer som eg hadde fått frå familien, frå mormor. Det hadde sentimental verdi.

Russ og Eurovision

Det er ikkje berre verdas største musikkonkurransen 19-åringen har fokus på for tida.

Han er nemleg også russ med alt det måtte innebere.

Faktisk har han hatt det så travelt i oppladinga til Eurovision at han ikkje ein gong har fått ordna russebuksa si når NRK møter han to veker før avreise til Basel.

– Verken eg eller mamma har hatt tid til å stryke på dei ulike lappane, fortel Kyle.

Han har derfor tatt med buksa på kostymeprøvinga i håp om at kostymedesignaren Kristine Barlow kan gjere det for han.

– Vi sa vi skulle ordne det, men vi visste ikkje at det var så mange lappar, seier Barlow spøkefullt.

Likevel er det ikkje russefeiringa som er topp prioritet akkurat nå. I år er faktisk finalen i Eurovision på sjølvaste 17. mai. Det betyr at viss Kyle Alessandro kjem heilt til finalen, må han altså stå over det tradisjonelle russetoget.

– Eg tek Eurovision som ei russefeiring. Det er kanskje ikkje den mest tradisjonelle russefeiringa, men det er draumen min, så det går heilt fint for meg å miste ho, seier 18-åringen.

13. mai skal Kyle Alessandro stå på scena under den fyrste semifinalen i Eurovision Song Contest. Han er nummer åtte i rekkefølgja.