Fryktar nytt kjempekraftverk skal rasere elva

Nær halvparten av norske vasskraftverk treng opprusting og fornying for milliardar av kroner, ifølgje NVE.

Målet er ei meir effektiv og stabil straumforsyning.

Eitt av kraftverka Statkraft no søker om å få ruste opp, er Aura kraftverk frå 1953.

Nye Aura II på Sunndalsøra på Nordmøre vil bli eitt av dei største kraftverka i Noreg, målt i effekt.

• Les også: Statkraft vil bygge nytt Aura kraftverk til 6 milliardar kroner.

– Redde for at dei siste dropane forsvinn

Opprusting av allereie eksisterande kraftanlegg blir sett på som skånsamt for naturen.

Men litt lenger vest for Sunndalsøra fryktar folk at oppgraderinga av Aura II vil føre til enda mindre vatn i elvene Aura og Eira. Dei trur dette vil gå ut over laks og anna liv i elvene.

Bygdelag og elveeigarlag i Eikesdalen og Eresfjord har saman med Molde kommune lenge jobba for å få krav om minstevassføring, utan å lykkast.

Samfunnet sitt behov for straum veg tyngre enn dei positive sidene ved å sleppe ut meir vatn, har staten bestemt.

• Les også: EU skjerpar krava til vasskraft som vil kalle seg grøn.

Tre store kraftutbyggingar på 50- og 60-talet har alt redusert vatnet i elva Aura med 75 prosent.

Eira var tidlegare kjent for å ha av ein av dei mest storvaksne laksestammene verda. Laksen hadde ei snittvekt på 12 kg. No er vekta redusert til 4 kilo.

Laksen har rett og slett tilpassa seg mindre vatn og krympa.

I dag ser store delar av elva Aura ut som ei steinrøys der ingen laks kan kome seg forbi.

Men av og til er det overløp i Aursjødammen.

Då blir det liv i elva igjen, og flaumvatnet reinskar opp elvebotnen slik at laksen får betre forhold.

Med det nye kraftverket vil det bli kapasitet til å ta også dette vatnet vekk frå Aura og ned til kraftverket i Sunndal.

– Vi er redde for at dei siste dropane forsvinn. At det blir heilt tørrlagt, seier Bård Eiliv Oppigard i Eikesdal bygdelag.

Kirsti Fagerslett i Eira elveeigarlag er også klar for ein ny kamp for vatnet i det som ein gong var ei av Noregs beste elver for laksefiske.

– Vi må ha levande natur. Eg har trua på at styresmaktene vil sjå at vi må ha plass til både vasskraft og levande natur, seier ho.

Bård Eiliv Oppgiard i Eikesdal bygdelag og Kirsti Fagerslett i Eira Elveeigarlag er klare for å kjempe for vatnet i elva igjen.

Foto: Hans-Olav Landsverk/NRK

– Grådig

Naturvernforbundet sin leiar Truls Gulowsen meiner det er forståeleg og logisk at Statkraft vil oppgradere Aura-kraftverket.

– Samtidig meiner eg det framstår som grådig at Statkraft i så stor grad foreslår ei oppgradering som både aukar effektuttaket og vassforbruket og dermed påverkinga på naturen, utan å foreslå betydelege naturtiltak for å kompensere for dei grove naturinngrepa som blei gjort i dette anlegget på 50-talet, og som aldri ville blitt tillate i dag, seier han.

Han legg til at dei er skuffa over mangelen på konkrete tiltak for naturrestaurering, og avbøtande tiltak elles, i søknaden til Statkraft.

Naturvernforbundet seier dei forstår ønsket om pumpekraft og høgare effekt i lys av behovet til samfunnet, men meiner dette må kompenserast betre.

– Både villaks, rein og andre naturforhold er allereie sterkt påverka.

– Positivt

Energiminister Terje Aasland (Ap) meiner det er positivt at det no ligg fleire nye søknader inne hos NVE om opprusting og utviding av eksisterande vasskraftverk.

– Det kan bidra med meir effektkapasitet i kraftsystemet vårt. Vi treng meir fornybar kraft i Noreg for å skape verdiar, utvikle lokalsamfunn og kutte utslepp. Slike prosjekt har ofte ikkje store naturinngrep fordi eksisterande infrastruktur blir nytta, skriv han i ein e-post.

Han ønsker ikkje å kommentere denne konkrete saka fordi konsesjonssøknaden er til behandling hos NVE.

– Vasskraft er fornybar og utsleppsfri energi, men inngrep i elvar og innsjøar kan påverke miljøforholda. Difor er det avgjerande med gode avvegingar mellom energiproduksjon og miljøomsyn, skriv Aasland.

Stortingsrepresentant Une Bastholm i MDG er samd med energiministeren i at vasskraft er ein verdifull ressurs for Noreg. Men ho er klar på at det må stillast strenge krav ved oppgraderinga av Aura II.

– Før utbygginga var Aura kjent som eit av landets beste laksevassdrag med ein storvaksen laksestamme. I dag er tilstanden for laksen dårleg og vasskrafta er hovudårsaka. Vi meiner lokalsamfunnet og naturen må få meir tilbake.

MDG meiner det må bli krav om minstevassføring i Aura, i tillegg til at andre naturkrav må på plass ved utbygginga.

– Slik prosjektet ser ut no, er vi bekymra for både villrein, for fjorden og for urørte naturområde.

Får støtte

I høyringa til konsesjonssaka for Aura II får lokalsamfunnet i Eikesdalen og Eresfjord støtte frå fleire instansar.

• Miljødirektoratet er uroa for laksen i vassdraget og ber om betre utgreiing av konsekvensane før det blir gitt konsesjon.
• Møre og Romsdal fylkeskommune og Molde kommune meiner mellom anna det må bli krav om minstevassføring i elva. Det betyr at kraftverket må sleppe ut ei viss mengde vatn til Auravassdraget slik at laks og aure kan overleve og gyte.

Statsforvaltaren i Møre og Romsdal har også levert inn ei motsegn fram til konsekvensane for livet i Auravassdraget er betre greidd ut.

Det betyr at det blir ei mekling før NVE eventuelt kan godkjenne planane. Om meklinga ikkje fører fram, må saka opp til endeleg avgjerd i Energidepartementet.

– Vi meiner konsekvensane for laks og sjøaure er altfor dårleg greidd ut. Ein ting er å beskrive problema, noko heilt anna er å finne ut korleis vi kan gjere det beste ut av det, seier underdirektør Ulf Lucasen hos Statsforvaltaren.

Dei foreslår mellom anna å målretta sleppe ut vatn til Auravassdraget i dei periodane det er gunstig for laksen, eller å bygge eit mindre kraftverk i elva Aura slik at det blir produsert straum samtidig som forholda for fisken blir betre.

– Det er jo definert at vi har kraftmangel, og det er ei samfunnsinteresse som er veldig sterk. Så det å berre sleppe vatn utanom turbinar er vanskeleg å få til, seier Lucasen.

– Veldig viktig for regionen

Aura II blir i prinsippet eit heilt nytt kraftverk som er plassert ein kilometer unna det som er på Sunndalsøra i dag.

Dagens kraftverk blei i utgangspunktet bygd for å gi straum til Hydro Sunndal – Noregs største forbrukar av straum.

– Utbygginga av Aura II er veldig viktig for regionen, for kommunen, det lokale næringslivet og for kraftberedskapen i fylket, seier prosjektleiar i Statkraft Are Paulsen.

I konsesjonssøknaden slår dei fast at endringane for Auravassdraget etter utbygging, vil vere minimale.

– Det konsekvensutgreiinga har vist, er at ein reduksjon i flaumtapet frå Aursjøen til Aura i Eikesdalen vil ha marginale verknader, og då hovudsakleg i flaumsituasjonar. Konsesjonsutgreiinga har dermed konkludert med at redusert flaumtap har ubetydeleg effekt for vassdraget, seier han.

Statkraft samlar no saman alle innspela dei har fått i høyringsrunden, og så er det opp til NVE å vurdere konsesjonssøknaden saman med høyringsuttalane.

– Vi ser at engasjementet er kjempestort. Og vi veit jo frå før at folk i området kan mykje om vasskraft og om miljøkonsekvensar. Så vi set veldig stor pris på at det kjem inn så mange høyringssvar, seier Paulsen.