Freyr Alexandersson ferdig i Brann

Sportsklubben Brann og hovudtrenar Freyr Alexandersson har etter samtaler blitt einige om å avslutte samarbeidet med verknad frå i dag.

Det skriv Brann sjølv på sine nettsider. Klubben vil informere meir om situasjonen i ein pressekonferanse klokka 14.00.

– Klubben ønsker å rette ein stor takk til Alexandersson for hans innsats gjennom perioden i Brann, står det i pressemeldinga.

Klubben trekk fram ein fantastisk prestasjon i Europaligaen og ein lidenskapeleg cupfinale i Oslo som hendingar som vil bli ståande som sterke minner i klubben si historie.

Ferdig halvtanna år før kontraktslutt

Den islandske trenaren vart henta til Brann som Eirik Horneland sin etterfølgjar 13. januar i fjor, og skreiv kontrakt med klubben ut 2027-sesongen.

Alexandersson kom då frå trenarjobben i belgiske Kortrijk, og hadde tidlegare trena danske Lyngby. Han har også vore hovudtrenar for det islandske kvinnelandslaget og assistenttrenar for herrelandslaget.

– Brann er ein fantastisk fotballklubb med ei rik historie og fantastiske supportarar. Det er ein by som brenn for Brann. Det var noko av det viktigaste for meg, å koma til ein klubb der klubben og byen heng saman på denne måten, sa Alexandersson då han signerte for Brann.

I sin fyrste sesong klarte 43-åringen å kapre ein fjerdeplass i den heimlege serien, medan det blei gruppespel og playoff til åttandedelsfinale i Europaligaen.

– Freyr Alexandersson har i si tid som hovudtrenar vore ein hardtarbeidande, karismatisk og engasjert trenar som har forstått kor viktig Brann er for Bergen og alle som er glade i klubben, skriv klubben vidare.

Assistenttrenar Jonathan Hartmanns arbeidsforhold i klubben blir også avslutta.

– Brann takkar Hartmann for hans klokskap, leiing og engasjement i si tid i klubben, står det i pressemeldinga.