Dette blir Noregs største ungdomsfengsel

– Vi har gode erfaringar så langt, seier fengselsleiar i Agder, Rolf Velle.

Ungdomsfengselet ved Agder fengsel, avdeling Evje, opna i april med to plassar. Førre månad blei kapasiteten auka til fire plassar. Planane er klare for ytterlegare utviding.

– Vi har brukt litt tid på å få på plass bemanning og få litt erfaring, så nå har vi auka til fire plassar, som er det talet vi har plass til i dag, fortel Velle.

Neste veke kjem statsråden for å opne ungdomsfengslet offisielt.

Størst i landet

Når avdelinga er ferdig utbygd, vil Evje ha det største tilbodet for ungdom i fengsel i Noreg.

– Vi skal opp i elleve plassar, og da må vi gjennom ei lita ombygging av avdelinga på Evje. Det tar litt tid, men erfaringa er eigentleg positiv. Vi har verkeleg fått utfordra oss, og vi ser at bemanninga der oppe har handtert dette kjempebra, seier Velle.

Mest varetekt

I tillegg til Evje finst det ungdomstilbod i fengsla i Bjørgvin og Eidsvoll.

Det som gjer ungdomsfengsel spesielt utfordrande, er at dei fleste ungdommane ikkje er domfelte – men sit i varetekt.

– I 2024 var 90 prosent av dei som blei sett inn i ungdomsfengsel i varetekt. Praksis er at dei får éin til to veker i første omgang, som ofte blir forlengd. Nokon sit få veker, mens andre sit ganske mange veker – til og med månader, seier Velle.

– Vi er også klare til å jobbe med dei som skal sone over tid her. Men vi trur den store overvekta framleis blir varetekt, fortel han.

Fleire tilsette

Utbygginga betyr også ein stor auke i bemanning.

– Da vi begynte nyrekrutteringa i år, var vi 25 årsverk på Evje. I løpet av hausten håpar eg å passere 70 tilsette, så det er ei stor endring, seier fengselsleiaren.

Målet er å kunne ta imot opptil 11 ungdommar frå nyttår, men tidspunktet er avhengig av framdrifta i byggearbeidet og når tilstrekkeleg bemanning er på plass.

– Nå kjenner eg ikkje det nøyaktige budsjettet frå 2026 og framover, men det verkar som vi skal ha gode nok rammar til å drifte Evje på ein god måte, seier han.

Fokus på barnets beste

Evje skil seg ut frå andre fengselsavdelingar ved at det er eit ungdomsfengsel, og med det følger eit spesielt ansvar.

– Det er ganske stor forskjell. Ungdom skal normalt ikkje sitte i fengsel, og ein prøver å finne andre løysingar for barn. Men nokon må vere i fengsel, og da er målet vårt å gjennomføre dette på ein så god måte som mogleg, seier Velle.

Han understrekar at det er høg vaksentettleik og eit sterkt fokus på å skape ein så normal kvardag som mogleg for ungdommane.

– Vi jobbar med å gjere vurderingar med barnets beste i fokus. Det skil seg klart frå andre fengsel, seier han.

Måndag 4. august blir fengsla offisielt opna.