Blei sittande i retten for å sjå videoen som skal vise at ho blei valdtatt

– Det er forferdeleg. Du er blottlagd, avkledd.

Det sa kvinna i vitneboksen om at Arne Bye hadde filma ei gynekologisk undersøking av henne.

Deretter valde ho å bli sittande i rettssalen mens videoen som skal vise at ho blir valdtatt av Bye blei vist.

Der sat ho ansikt til ansikt med Arne Bye, som nektar for å ha valdtatt kvinna.

– Eg blir sint

Kvinna er ei av dei tre fornærma kvinnene som forklarte seg i retten torsdag.

Bye er tiltalt for å ha valdtatt dei tre kvinnene ved å føre gjenstandar inn i kvinnene sine skjedar utan at det var medisinske grunnar til det.

Han erkjenner ikkje straffskuld for nokon av disse valdtektene.

Torsdag fekk retten igjen sjå video frå legekontoret som skal vise valdtektene.

Kvinna som blei sittande i salen for å sjå videobeviset og høyre Bye forklare seg, fortel at ho ikkje hadde nokon mistanke om at ho blei filma.

– Når eg ser den videoen, blir eg eigentleg veldig lei meg. Eg føler at han har svikta og utnytta meg. Og så blir eg sint, sa kvinna før beviset blei vist for retten.

Kvinna fortalde også retten at ho har fleire døtrer som har hatt Bye som lege og som har blitt filma på legekontoret.

Døtrene har fått sakene sine lagt bort, i likskap med mange andre, fortalde kvinna.

Brukte «sylinderforma» gjenstand i skjeden

– Sikta plasserer ein kvit kurv mellom beina til kvinna. I kurven ligg det eit kamera som filmar, las aktor Rikhard Haugen Lyng frå politiet sin gjennomgangsrapport av videoen.

Videoen retten fekk sjå viste ei gynekologisk undersøking der Arne Bye mellom anna skal ha ført ein «sylinderforma» gjenstand inn i kvinna si skjede.

– Sikta fører inn eit metalliknande rør i skjeden, las Haugen Lyng.

Bye har tidlegare fortalt at dette har vore ein inhalator for barn.

Han erkjenner ikkje at han har gjort noko straffbart overfor kvinna.

Da Bye forklarte seg fortalde han at han ikkje huska akkurat den undersøkinga der han er tiltalt for å valdta kvinna, men at han brukte inhalatoren for å få betre innsyn til livmorhalsen.

– I dette tilfellet var eg vel kanskje frustrert over at eg ikkje klarte å sjå det eg ønskte å sjå. Eg kan ikkje gjere greie for det på nokon anna måte.

Kvinna fortalde at den delen av undersøkinga der Bye brukte inhalatoren var vond.

– Det blir hennar skildring. Eg har ikkje noko spesiell kommentar til dette, sa Bye.

– Ikkje medisinsk utstyr

Onsdag gav dei medisinsk sakkunnige ein tilleggserklæring basert på video frå fleire av Byes undersøkingar.

Professor Mette Haase Moen las opp erklæringa som peikte på fleire ting ved undersøkingane hos Bye dei sakkunnige meinte var kritikkverdige.

– Det blir brukt utstyr som ikkje er medisinsk utstyr eller som ikkje er hensiktsmessig til undersøkinga, las Haase Moen.

Dei sakkunnige har tidlegare uttalt at det ikkje er naudsynt å bruke alternativt utstyr under gynekologiske undersøkingar.

– Dersom ein er i eit u-land kan det forsvarast, men i vår del av verda må ein bruke adekvat utstyr, sa Haase Moen da dei sakkunnige gav den første erklæring si.

Hei!

Er du eller nokon du kjenner påverka av Frosta-saka? Har du ei oppleving eller historie å fortelje? Eller har du innspel eller tips til kven vi burde snakke med?

Da vil vi veldig gjerne høyre frå deg!

All informasjon blir behandla konfidensielt.

Julie Haugen Egge, Henning Levold og Sunniva Skurtveit

Journalistar i NRK Trøndelag

Send oss ein e-post