WHO evakuerer kvinner og barn frå Gaza

Dei evakuerte skal sendast til ulike europeiske land, seier Hans Kluge, som er direktør for WHO i Europa, til nyheitsbyrået.

– Israel har forplikta seg til ytterlegare 1000 medisinske evakueringar til EU i løpet av dei neste månadane, seier han.

Det er WHO som skal legge til rette for evakueringane til dei europeiske landa som er involvert.

Sidan krigen i Gaza starta i oktober i fjor, er 600 personar evakuerte av WHO i Europa av medisinske årsaker frå Gaza.

– Dette hadde ikkje vore mogeleg om vi ikkje hadde ein open dialog med partane, seier Kluge.

WHO sa i mai at det er var rundt 10.000 menneske i Gaza som burde ha vore evakuerte fordi dei treng akutt medisinsk hjelp, skriv AFP.

Vaksinerer mot polio

Forholda i krigsområda gjer også at sjeldne sjukdommar blomstrar opp. I førre månad starta den første runden av vaksineringa av over ein halv million barn, etter at det blei påvist polio i Gaza for første gong på 25 år.

I førre veke starta dei på den andre runden med vaksinering.

Kampanjen er eit samarbeid mellom blant andre det palestinske helsedepartementet, WHO, FNs barnefond (Unicef) og FNs hjelpe- og arbeidsbyrået for palestinske flyktningar (UNRWA).

Humanitære pausar er eit vilkår for å kunne gi vaksinar og helsehjelp i Gaza, seier WHO.

– I område med humanitære pausar, gav kampanjen ikkje berre vaksinar, men også augneblink med ro, sa Rik Peeperkorn, som er WHOs representant i dei okkuperte palestinske områda, i samband med oppstarten av den andre runden med vaksinar.