Wennesland til NRK: Framgang i gisselforhandlingane

– Det er meir konkrete diskusjonar no enn det har vore på ei stund, og det er meir konkret i detaljane om byte av gislar mot fangar.

Det seier FNs spesialutsending for fredsprosessen i Midtausten til NRK torsdag morgon, norske Tor Wennesland.

Han seier han har fått dette stadfesta av den egyptiske utanriksministeren i Oslo denne veka. I tillegg har han snakka med dei israelske forhandlarane.

Men partane har fått dårlegare tid.

– Det som er greia her, er at eg trur ein deadline for den prosessen som skjer no er 20. januar. For då kjem det eit nytt regime i Washington, seier han.

– Eg trur at moglegheita for å få til ein avtale vil vere best dersom det blir ei løysing i Gaza, med dei ordningane og forhandlarane vi har no.

«Heilt ubegripelege» tap i Gaza

Det siste døgnet har minst seks personar blitt drepne i eit israelsk luftangrep mot eit hus i Gaza by, og minst åtte i grensebyen Rafah, ifølge helsepersonell på Gazastripa.

Dei drepne i Rafah skal ha jobba med å sikre lastebilar med naudhjelp, skriv nyheitsbyrået Reuters.

Det israelske militæret (IDF) har ikkje kommentert skuldingane.

– Eg trudde vi var nærme fred då eg starta i jobben for fire år sidan, og har berre måtta sjå på at verden blei snudd på hovudet og vesentleg vanskelegare, seier Wennesland.

– Tapa i Gaza er heilt ubegripelege. Det vil vere å håpe at ein finn ei løysing, og den løysinga må vere politisk.

Overveldande fleirtal i FN for våpenkvile

Onsdag kveld vedtok FNs hovudforsalming ein resolusjon som tek til orde for ei umiddelbar, vilkårslaus og permanent våpenkvile i Gaza.

Den ber samtidig om at alle gislar blir slepte fri.

Den symbolske avstemminga i New York skjedde etter at USA stoppa ei liknande ei i FNs tryggingsråd. Alle dei 14 andre landa i tryggingsrådet støtta resolusjonen.

Årsaka til vetoet, ifølge USA, var at dei meiner alle krav om våpenkvile også må krevje lauslating av alle gisla på Gazastripa.