Varsku om utdaterte norske kart

«Dersom Noreg ikkje tar grep, risikerer vi forseinkingar i bustadbygging, svakare beredskap, tregare respons i kriser og tapte moglegheiter for næringsutvikling».

Det er konklusjonen i ein ny rapport som i dag blei overlevert til kommunal- og distriktsminister Kjersti Stenseng (Ap).

Statsråden lovar å gå gjennom oppfordringane.

– Dette er avgjerande for samfunnsutviklinga, sa ho ved overrekkinga i Marmorhallen i Klima- og miljødepartementet.

Rapporten frå Kartverket kjem mot eit dystert bakteppe:

Den «djupe freden» er forbi, og vêret har blitt villare og våtare. På toppen er det behov for å bygge fleire bustader – men kor?

NRK har tidlegare skrive at «klimatilpassing har låg valpolitisk verdi» og at kommunane fortset å planleggje bustader i utsette område.

I fjor viste oppdaterte flaumsonekart at 300.000 nordmenn bur i område som er utsette for flaum og skred.

– Stadig høgare krav til presise kartdata

Betre kart kan utgjere forskjellen på liv og død, er bodskapen frå kartverkssjef Johnny Welle.

Ved overrekkinga gjorde han eit poeng av at vi er i ferd med å skusle vekk eit historisk forsprang, og at nytta av kartdata i Noreg fell samanlikna med andre land.

– Meir ekstremvêr, ein uføreseieleg geopolitisk situasjon og auka behov for bustadbygging stiller stadig høgare krav til presise kartdata.

Lars Erik Bragstad i Norsk Luftambulanse var med under overrekkinga. Han forklarte at gode kartdata er avgjerande for sikkerheit i lufta, og påkalla helikopterstyrten i 2014 som kosta livet til to medarbeidarar.

– Utan pålitelege geografiske data vil luftambulansen ha store utfordringar med å sikre liv og helse til pasientar og tilsette. Geografiske data er avgjerande for sikkerheit i lufta, seier han.

NVE-sjef Rune Verpe Engeset understreka kor avgjerande gode kart er for å varsle om flaum, skred og andre naturhendingar.

Noreg skal bli meir «klimarobust»

KS har varsla at det trengst eit «taktskifte» for å styrkje den norske klimatilpassinga.

Bakgrunnen var ei åtvaring frå Riksrevisjonen om store etterslep i førebuingane til eit villare og våtare klima.

Dommen var på nest sterkaste kritikknivå: «alvorleg kritikk».

Sidan kom ein av dei dyraste naturkatastrofane i Noreg i nyare tid («Hans») og «tvang» fram endå grundigare evalueringar.

Støre-regjeringa svarte på kritikken med å legge fram ei melding om korleis Noreg skal bli meir «klimarobust».

For å oppdatere kunnskapsgrunnlaget i møte med hyppigare og større flaumar sette Støre-regjeringa i 2022 ned ein «Totalberedskapskommisjon».

I januar kom Totalberedskapsmeldinga, som seier at Noreg må førebu seg på ein «verstefallsituasjon» med krig.