Dorjot Návuona skuvlla boazodoalloprošeavtta
Sámediggeráđđi addá 150 000 ruvnnu doarjaga prošektii Návuonas mas oahppit besset oahpásnuvvat boazodollui báikkálaš fitnodahkan ja ealáhussan.
Návuona mánáid- ja nuoraidskuvlla birrasii čuođi oahppi galget oahppat árbevirolaš boazodoalu ja dan mearkkašumi birra ealáhussan. Sii galget maid oažžut máhtu bohccuid birra, daid láhttema, eallinvuogi ja bohcco mearkkašumi birra sámi kultuvrras.
Ulbmil lea earret eará ásahit buori oktavuođa báikkálaš olbmuid gaskkas, mas oahppit besset oahpásmuvvat boazodollui báikkálaš fitnodahkan ja ealáhussan.
– Mun lean ilus dan áŋgiruššama dihte maid skuvla čájeha, go háliida buoridit máhtolašvuođa sámi boazodoalu birra skuvllas. Seammás addá prošeakta ohppiide eanet máhtu ja ipmárdusa dán ealáhusa birra mii lea deaŧalaš oassi Návuonas, dadjá Johttisámelistu sámediggeráđđi Berit Marie P. E. Eira preassadieđáhusas.
Oassin prošeavttas lea oahppat dápmama birra ja maiddái oahppat árbevirolaš biebmoráhkadanvugiid.
– Oahppit ožžot vejolašvuođa oahppat báikkálaš sámi árbedieđuid praktihkalaš bargguid bokte. Dakkár prošeavttat leat dehálaččat oahpahusas, dadjá Eira.
English (US)