Taxisjåføren irritert – berre han har aldersgrense

– Eg synest det er så urettferdig som det kan få blitt, seier Jan Paulsen.

Fram til mai i år kunne han jobbe som taxisjåfør. Ein jobb han likte veldig godt.

Da han fylte 75 år i mai søkte han om å få fortsette, men fekk blankt nei. Sjølv med ny helseattest og anbefalingsbrev frå politiet måtte han slutte.

– Ulogisk grense

Grunnen er eigne reglar for drosje- og bussjåførar. Etter at dei har fylt 75 år kan dei ikkje lenger frakte personar mot betaling.

I mai og juni har Paulsen derfor køyrt for frivilligsentralen i Sandefjord. For det er lov. Der køyrer han minibuss med inntil 9 passasjerar.

– Eg finn dette ulogisk. Einaste forskjellen er at der får eg ikkje lønn. Men eit menneskeliv er eit menneskeliv, om eg køyrer for velferdssentralen eller denne taxien. Men det er det tydeleg at det har dei gløymt, seier Paulsen.

Taxiforbundet fortel at dette er ei sak dei ønskjer å sjå nærare på.

Ifølgje styreleiar Øystein Trevland i Taxiforbundet er det fleire som har teke kontakt med forbundet om denne 75-årsgrensa. Han seier at dette er noko dei ønskjer å ta opp med politikarane no etter ferien, for å høyre om det er mogleg å gjere noko med reglane.

Skip – OK, Lastebil – OK, Taxi – Nei

Ein kjent av Jan Paulsen er Edvard Eriksen (77). Han har førarkort for lastebil og kan ta oppdrag når han vil.

– Eg synest det er litt rart at grensene for taxi er slik, seier Eriksen.

Kaptein Jon Waggestad (77) jobbar framleis på passasjerferjer. For han er det ikkje noka aldersgrense.

– Her er det helseattesten som er absolutt, fortel Waggestad.

Men Waggestad peikar på ein liten forskjell. Som kaptein på eit skip er han ikkje aleine. Det er alltid nokon andre om bord som kan trø til om noko skulle skje.

Vil hindre alvorlege ulykker

Seinast i 2021 bad NHO Transport om ei revurdering av alderskravet for buss og taxi.

Samferdselsdepartementet fekk da ei fagleg vurdering frå Helsedirektoratet og Vegdirektoratet.

Helsedirektoratet skriv dei reknar med at risikoen for ulykker aukar for personar over 75 år.

Vegdirektoratet meiner at det å ta betalt for å køyre folk har noko å seie for kva risiko som kan aksepterast. Risikoen må vere låg når det er ein del av offentleg transport, der brukarane ikkje har noko val, meiner direktoratet.

Jan Paulsen og taxien han er så glad i å kjøre

Kompisen Jon Waggestad (77) er skipper på denne båten

Så lenge helseattesten er i orden kan Jon Waggestad jobbe som kaptein på store båter og skip selv om han er over 75 år

Edvard (77) kan kjøre vogntog, men Jan (75) får ikke lov til å kjøre taxi på grunn av alder

Jan Paulsen synes regelverket er urettferdig

– Meir involvert i ulykker

Risikoen aukar med alderen. Det fortel statssekretær Bent-Joacim Bentzen (Sp) i Samferdselsdepartementet.

– Tal frå Utrykkingspolitiet viser at 3 prosent av dei som ferdast i trafikken er over 75 år gamle. Desse er derimot involverte i 20 prosent av ulykkene som skjer, seier Bentzen.

På spørsmål om kvifor det ikkje da er aldersgrense for å føre vogntog og lastebilar, eller for å vere kaptein på skip, svarer departementet følgande:

– Køyresetel er nødvendig for å frakte passasjerar på norske vegar. Vi meiner det er forskjell på å transportere ting og passasjerar. Vi understrekar likevel at også lastebilsjåførar er underlagde strenge helsekrav.

Departementet avviser å endre reglane nå.