Tar Jimmy Kimmel av lufta «på ubestemt tid»

Talkshowet til Jimmy Kimmel vert teke av lufta «på ubestemt tid».

Det seier ein talsperson for TV-kanalen ABC ifølge fleire medium.

Det skjer på grunn av kommentarar Kimmel har kome med i kjølvatnet av drapet på ytre høgre-aktivisten Charlie Kirk, skriv mellom anna Variety.

I ein monolog i denne vekas sending antyda Kimmel at mannen som er sikta for drapet, var ein støttespelar av Donald Trump.

– Me trefte nye lågpunkt i helga med Maga-folka som desperat prøvar å karakterisera fyren som drap Charlie Kirk som noko anna enn ein av dei, og som gjer alt dei kan for å skåra politiske poeng på det, sa Kimmel ifølge Hollywood Reporter.

Jimmy Kimmel har leia talkshowet «Jimmy Kimmel Live!» på ABC sidan 2003.

Det har vore eit av dei viktige kveldsprogramma på amerikansk TV, i tillegg til «The Late Show» på CBS og «The Tonight Show» på NBC.

– Støytande og ufølsame

Kort tid før ABC meldte at Kimmel vert teken av lufta, kunngjorde selskapet Nexstar at dei ikkje ville visa onsdagens episode på sine kanalar.

Nexstar er ein av dei største eigarane av lokale TV-stasjonar i USA.

– Kommentarane til Kimmel om drapet på Kirk er støytande og ufølsame på det som er eit kritisk punkt i den politiske samtalen i landet vårt, og me trur ikkje at dei gjenspeglar meiningane, synspunkta eller verdiane til lokalsamfunna der me er til stades.

Det seier Andrew Alford, sjefen for kringkastingsavdelinga til selskapet, i ei utsegn.

Kimmel sjølv har førebels ikkje kommentert saka.

Fleire har mista jobben

Fleire i USA har mista jobbane sine etter å ha ytra seg om drapet på Kirk, skriv BBC.

Pilotar, helsepersonell, lærarar og ein tilsett i Secret Service er blant dei som har vorte suspenderte eller fått sparken etter å ha lagt ut «upassande innlegg» om drapet i sosiale medium.

Visepresident J.D. Vance har bede folk om å rapportera dei som «feirar» drapet til arbeidsgivarane deira.

Fleire politikarar på høgresida i USA har kome med liknande utsegner.