Du følger Venba og ektemann hennar Paavlan, som emigrerer frå Sør-India til Toronto i Canada på 1980-talet.
Dei søker etter eit betre liv – særleg for sin enno ufødde sønn.
Men dei har ofra mykje.
Heimlengselen er sterk og dei finn ikkje heilt sin plass i det nye heimlandet sitt.
Hjartet i det nye livet deira blir mat, og den viktigaste eigedelen i heimen er kokeboka Venba har arva frå mora si.
Oppskriftene er ufullstendige, og din jobb blir å finne fram til rett rekkefølge av ingrediensar og generell framgangsmåte.
Og det er ei sann glede å finne flyten her.
Fenikkel, nellik, kardemomme og laurbærblad freser i oljen, og får følge av løk, ein puré av ingefær og kvitløk, chili og tomatar.
Det blir presentert som ein slags fest.
Fengande musikk – inspirert av tamilske filmar og framført av musikarar frå Sør-India – gir matlaginga ei uimotståeleg rytme.
For meg passar vel beskrivinga «etnisk» godt. Men for mange er desse nydelege kjøkkenscenene i «Venba» sjølve definisjonen på «heime».
Ufullstendig kokebok
Du lagar nydelege, velduftande og smakfulle tamilske rettar. Idli, puttu og biryani brettar seg ut over skjermen og gjer meg svolten på ekte.
Mellom kjøkkenscenene følger du denne kanadiske innvandrarfamilien gjennom fleire tiår.
Spelet er ein openberr hyllest til ei altoppofrande mor, men perspektivet framstår som eit tilbakeblikk frå sonen i huset.
Kavin blir nemleg fødd i spagat mellom sin tamilske heim og sine kanadiske skulevennar.
Han vil heller ete hamburgar enn biryani.
Avstanden er såpass stor at det blir bygd ein vegg mellom han sjølv og foreldra.
Treffer ein nerve
Og når Kavin etter kvart blir vaksen og reflekterer over kvar han kjem frå og kva foreldra har ofra for han, treffer denne historia ein nerve som har dirra i både Canada, Noreg og resten av den vestlege verda i mange tiår.
Denne spagaten mellom to kulturar, eller «pepperkake papadum» som Karpe beskriv det som i låta «Iboprofen», kan vere ei bortimot umogleg øving når den møter motstand frå omgivnadane.
Men mat kan gjere spagaten mindre vond å stå i.
Og det er nok derfor historia i «Venba» treffer så innmari godt.
Eg er også eit produkt av innvandringa til Noreg.
Haldningskampanjar mot rasisme på den eine sida og urokkelege krav om «bevaring av norsk kultur» på den andre har følgt meg gjennom skulegang, i debattinnlegg i avisene og i diskusjonar på jobb og fest.
Det er utruleg å tenke på at den første indiske restauranten i Noreg ikkje opna før i 1982. Vi fekk ikkje paprika før på 80-talet. Den første sushi-restauranten kom i 1987.
I dag er omtrent alle verdas kjøkken representerte i Noreg på eitt eller anna vis.
Kor forbanna kjedeleg ville ikkje Noreg ha vore utan denne floraen av ulike matopplevingar?
Sjølv hardbarka rasistar snik seg til ein kebab i ny og ne, dei berre unnlet å poste om det på Instagram.
Mat som brubyggar
Mat kan verkeleg vere ein brubyggar mellom kulturar, akkurat som det endar opp med å bli for Kavin og foreldra hans.
«Venba» er eit spel som formidlar dette på særdeles treffande og rørande vis på eit par kompakte, smakfulle timar.
Det festar seg i bevisstheita og gjer eit uutsletteleg inntrykk.
Trass den enkle (men vakre) grafikken, blir ein ført inn i eit truverdig og autentisk kjøkken. Lydbildet kjem frå faktiske opptak av at rettane blir laga i verkelegheita, og musikken er heilt herleg.
Eg tror «Venba» treffer ein heil generasjon innvandrarbarn som står eller har stått i same spagat som Kavin.
Spelet fortel ei historie mange vil kjenne seg igjen i.
Dermed blir «Venba» noko meir og noko langt større enn ei interaktiv kokebok.
Det er ein hyllest til mødrene og fedrane som trassa heimlengsel, kultursjokk og rasisme for framtida til barna sine.
Og ein varm invitasjon til toleranse og innsikt for oss kvite menn som pushar 50.
PS: «Venba» har blitt nominert til ei rekke prisar, og blei nyleg kåra til beste spel i 2023 under den prestisjetunge prisutdelinga Independent Games Festival Awards (IGFA). Spelet er testa på PC.
Publisert 10.04.2024, kl. 13.34