Snø på fjellovergangane – oppfordrar til dekkskift

Onsdag har snøen lagt seg på fleire fjellovergangar i Sør-Norge.

Hemsedalsfjellet, Filefjell, Tyin-Årdal og Sognefjellet er blant vegstrekningane som har fått snø. Fylkesveg 5627 over Aurlandsfjellet blir stengd på grunn av snø fram til torsdag morgon.

Nedbøren var varsla. Meteorologisk institutt sende ut varsel om at det skulle kome mellom 5 og 15 centimeter snø over 800-1000 meter over havet.

VARSLA: Snøfallet som kom onsdag, var venta. Foto: Meteorologisk institutt

Ventar meir snø til helga

– Den kjølige lufta held fram med å ligge over oss dei neste dagane, men vi får tørt vêr både i dag, torsdag og på starten av fredagen, seier statsmeteorolog Julie Solsvik Vågane ved Meteorologisk institutt.

– Det er først til helga igjen at vi får litt byer. Det kan bli endå kjøligare enn det er no, og snøgrensa kan krype lenger nedover, legg ho til.

Sjølv om det ikkje kjem meir nedbør fram mot helga, kan det framleis fryse på i fjellet, fortel Vågane.

Oppfordrar til dekkskifte

Neste veke er det haustferie i Akershus, Buskerud, Oslo, Østfold, Agder, Troms, Finnmark og Nordland. Viss du skal på biltur opp i høgda, er oppfordringa klar.

– Skal ein over fjellet i helga, så bør ein sko bilen etter forholda, seier Vågane, og får støtte frå Statens vegvesen.

– No er sesongen i gang. Bruk vinterdekk og berekn litt lengre tid, seier trafikkoperatør Stein Nestås i Vegtrafikksentralen vest.

– Sjølv om du har gode dekk, så kan du få forseinkingar på grunn av andre køyretøy som har problem, minner han om.

Sjølv om snøvarselet no gjeld over 800 høgdemeter, kan det lokalt kome snø endå lågare, opplyser meteorologen. Det har det mellom anna gjort på Borlaug, som ligg på 500 høgdemeter, øvst i Lærdalsdalen.