Putin gratulerer Trump med sigeren: – Han er modig som ein mann

Vladimir Putin gratulerte Donald Trump med valsigeren torsdag kveld. Putin seier han er imponert over korleis han sikra sigeren over Kamala Harris, spesielt etter attentatet tidlegare i år.

– Han er modig som ein mann, seier Putin.

Han seier han er klar til å prate med han. Det at Trump vil få ein slutt på krigen, fortener merksemd, seier han.

– Det er ikkje feil å ringe.

Hevda han skulle få slutt på krigen

Matthew Miller, talsperson for Det kvite hus, sa tidlegare torsdag at dei skal gjere «alt i si makt» for å sende all hjelp til Ukraina før Biden går av som president.

Trump har vore kritisk til korleis Biden har støtta Ukraina i krigen mot Russland.

Under eit valkampmøte i 2023 sa Donald Trump at han kjem til å få slutt på krigen i løpet av eitt døgn, dersom han blir president. Det same gjentok han i september i år.

Det var under Bidens presidentperiode at Russland invaderte Ukraina. Hundretusenar er drepne til no. Ukraina taper på slagmarka.

Samstundes nekta Donald Trump, USAs neste president, å svare på om han ønsker at Ukraina skulle vinne krigen under presidentdebatten i september.

Zelenskyj kjenner ikkje til Trumps plan

Ukrainas president Volodymyr Zelenskyj sa torsdag at han ikkje har noko innsikt i detaljane i Trump sine planar om «få slutt på krigen raskt».

Han seier han ikkje har diskutert dette nærare med Trump. I valkampinnspurten var Zelenskyj på besøk hos både Trump og Harris i USA.

– Eg trur at Trump vil få slutt på krigen, men det betyr ikkje at det kjem til å skje, seier han frå talarstolen i Budapest under European Political Community Summit.

For at Russland skal gå inn i fredssamtalar, har Putin kravd at Ukraina skal gi frå seg territorium. Ifølgje AFP, skal Zelenskyj ha anklaga fleire europeiske leiarar for å sterkt presse dei til å inngå slike kompromiss.

– Vi treng tilstrekkeleg med våpen, ikkje støtte i samtalar. Klemmar med Putin hjelp ikkje. Nokre av dykk har klemt han i 20 år og ting blir berre verre, sa Zelenskyj.