Politiet arresterte eigaren og fann servalen – uvisst om dyret blir avliva

Eit dyr som mange trudde var ein leopard, vart rikskjendis i fjor sommar. Eigaren av det ulovlege kjæledyret gjekk under jorda, men etter eitt år arresterte politiet henne tysdag morgon.

– Ho blei pågripen i 5–6-tida i dag tidleg i Haugesund-området, seier advokaten hennar, Roy André Håkonsen Arteid, til VG.

Sidan sommaren 2023 har kvinna levd i skjul – i frykt for å miste det afrikanske kjæledyret sitt.

Då blei det eksotiske kattedyret observert gatelangs i Os utanfor Bergen. Naudetatane fekk mange telefonar om dyret, og folk blei bedne om å halde avstand.

Kattedyret viste seg å vere ein serval. Det afrikanske kattedyret er forbode å ha som husdyr i Noreg.

Miljødirektoratet melde kvinna til politiet, og uttalte at dyret truleg ville bli avliva. Eigaren blei sikta både for å ha dyret som husdyr og for å innføre dyret til Noreg.

Miljødirektoratet avviste i fjor haust eit forslag om å omplassere servalen til Sør-Afrika.

Har erkjent straffskuld

Medan ho var på rømmen, har kvinna på telefon til politiet erkjent straffskuld. Ho blei lauslaten av politiet i ettermiddag. Då hadde dei i løpet av dagen funne og tatt beslag i servalen.

Ifølge Arteid blei kvinna halden på glattcelle til i 14-tida. Til BT seier han at ho ikkje ønskte å bidra med informasjon som kunne gjere at Niño blei funnen.

– Ho er ein lovlydig borgar med unntak av at ho har halde denne katten, seier forsvararen.

Politiet fann likevel servalen i eit hus i same område som der kvinna blei pågripen i bilen sin. Det er ikkje kjent om det er der kvinna har halde seg skjult.

Servalen blir nå tatt hand om av Mattilsynet.

Kjempar mot avliving

I kveld er servalen framleis i live, opplyser politiadvokat André Jakobsen i Vest politidistrikt. Han seier saka vil bli behandla i løpet av veka.

– Vi gjer eit vedtak som Mattilsynet stadfestar. Det blir dei som avgjer kva som skjer vidare, seier han til VG.

Kattedyret er nå varetatt av Mattilsynet, som ikkje ønsker å kommentere saka.

Arteid seier han jobbar med ulike instansar for å forhindre avliving.

Kvinna blei intervjua av VG i fjor og fortalde om korleis ho hadde sagt opp jobben, flytta frå venner og familie og ikkje torde å bruke mobiltelefon i frykt for å bli spora elektronisk.

Dyrevernar: – Ikkje straff dyret

Dyrevernorganisasjonen Noah meiner eigarar av ulovlege kjæledyr bør bli straffa.

– Å halde eksotiske dyr som kjæledyr bør vere forbode både av omsyn til dyrevelferd og vern av artar. Dei som ulovleg har sett dyr i ein slik situasjon, bør få straff. Men avliving av dyret er slett ikkje forsvarleg – det blir å straffe offeret, altså dyret, seier Noah-leiar Siri Martinsen.

Det var hennar organisasjon som føreslo omplassering i Sør-Afrika.

– Noah har fleire gonger kontakta Miljødirektoratet for å få løyve til å tilby ei løysing der Niño kan leve vidare med god dyrevelferd i eit artstilpassa miljø. Vi har hittil berre blitt avviste, seier Martinsen.

NTB har i dag kontakta Miljødirektoratet, men har ikkje lukkast i å få ein kommentar.