Per Narve Overrein er ikkje som pensjonistar flest.
Med over 1800 studiepoeng på vitnemålet, har ikkje 80-åringen lagt på latsida sidan han gjekk av med pensjon for 20 år sidan.
– Det har vore ei fantastisk reise. Nytta er kanskje ikkje like stor, men eg har det moro medan eg held på og eg har ein aktiv kvardag, seier Overrein.
Han har nemleg studert sidan han gjekk av med pensjon for tjue år sidan, og har på den tida skrive heile fire masteroppgåver.
Les den erfarne studenten sine beste tips til ferske studentar lenger nede i saka.
Flittig student
Etter ei lang yrkeskarriere innan både Finansdepartementet, politikken og fagvesenet, kjende Overrein seg klar til å gå av med pensjon då han fylte 60.
Men det var ikkje for å slappe av, reise på turar eller bruke tid framfor TV-en. Han ville heller tilbake på skulebenken.
– Eg hadde ein nabo som var russisk, så ho meinte eg burde studere det. Eg heldt på med det ei stund, men det blei litt for vanskeleg, seier Overlid.
I staden blei det tysk litteratur. Han likte å følgje førelesingar og melde seg opp til eksamen for at det skulle bli ei kjensle av alvor. Han blei oppmoda til å levere masteroppgåve, og i 2013 gjorde han nettopp det.
Og det skulle ikkje bli den siste.
– Eg har no avlevert masteroppgåve i tysk litteratur, sosialantropologi, kulturhistorie og seinast juss som eg leverte i vår, seier Overrein.
Det kjem då i tillegg til gradane han tok i statsvitskap og sosialøkonomi frå 60- og 70-talet.
Det var Khrono som først omtalte saka.
Over 2000 pensjoniststudentar
Overrein er ikkje den einaste studenten på sin alder som vel å studere etter at dei har gått av som pensjon.
I 2023 var det 2053 personar over 60 år som var registrert som studentar. Det viser tal som Direktoratet for høgare utdanning og kompetanse har samla inn for Khrono.
Tala viser også at nesten halvparten av dei på over 60 år, ikkje produserte studiepoeng i det heile tatt, altså at dei ikkje tok eller fekk godkjent eksamen.
Overrein meiner likevel det er fint at pensjonistar får lov å studere.
– Det kan då ikkje vere så dyrt å ha ein pensjonist eller to som følgjer med på førelesingane. Det held oss aktive og gjer oss meir interessante menneske, seier han.
Han er uansett opptatt av at han skal gi litt tilbake for utdanningane han no har tatt.
– Eg har heile tida meint at ein må ta på seg frivillig arbeid. Eg har prøvd å gi tilbake gjennom organisasjonsarbeid. Mellom anna sit eg no i bydelsutvalet i min bydel. Då kjem mykje av utdanninga til gode.
Pensjonistens beste tips
Det var aldri toppkarakterar som var målet til Overrein då han nok ein gong tok fatt på studielivet.
No vil den erfarne studenten dele sine tips til studentar som ikkje nødvendigvis går for toppkarakterar, men som ønskjer å lære mykje om forskjellige fagfelt.
Då er det særleg ein ting som gjeld, og det er engasjement.
1. Finn tema du er interessert i.
Overrein meiner nøkkelen til ei god studietid med godt utbytte, er å halde studietida lystprega og halde engasjementet oppe.
Det inneber først og fremst at ein må velje fag og emne ein sjølv finn interessante.
– Å kjede seg er ein ganske håplaus studiestrategi. Ein må ha lyst til å lese, seier Overrein.
Då gjeld det å velje breitt, og ikkje berre ta dei tyngste og snevraste faga, meiner Overrein.
2. Lån bøker på biblioteket
Vidare meiner han at når ein først har funne eit tema ein finn interessant, bør ein lese meir enn berre det som står på pensum.
Det er dyrt å vere student, så han oppmodar om å utnytte moglegheitene på universitetet.
– Det er viktig å lese meir enn berre det som står på pensum, Det er kan vere dyrt å vere student. Overrein råder studentar til å låne bøker framfor å kjøpe dei, og gjerne gå utover pensumlista.
– Lån fleire bøker framfor å kjøpe dei. Og lån andre bøker enn dei som er på pensum.
3. Møt opp
Mange kan no følgje undervisning digitalt fleire stadar. Overrein meiner likevel det er gunstig å møte opp på universitetet og å mingle med andre studentar.
– Møt opp fysisk på førelesing og ta deg tid til å drikke kaffi og snakke med folk. Ofte får ein inspirasjon av dette, seier Overrein.
4. Ikkje slit for mykje
Til sist meiner han mange ferske studentar fort kan gå i fella at dei brukar for mykje tid på for få sider når dei skal lese. Difor råder han dagens studentar til ikkje å slite for mykje.
– Det gjeld å få overblikk. Ein treng ikkje lese for nøyaktig, men få oversikt og heller gå tilbake til det som er viktig. Ein må lære ting skikkeleg, ikkje fort.