Nær halvparten av sørlendingane trur Jesus stod opp på påskemorgonen

Den kristne trua har lenge stått sterkt på Sørlandet.

Landsdelen blir gjerne kalla «bibelbeltet».

Meiningsmålinga, som er gjord på oppdrag for Fædrelandsvennen, bekreftar dette.

26 prosent svarer at dei trur Jesus stod opp fysisk, 20 prosent at Jesus «stod opp på ein eller annan måte, men ikkje fysisk».

– Oi, det var jo fleire enn eg trudde, seier domprost Nils Terje Andersen til avisa.

40 prosent trur ikkje Jesus stod opp frå dei døde, mens 14 prosent er usikre.

Ifølge Bibelen stod Jesus opp på påskemorgonen, etter å ha døydd på korset langfredag.

800 personar blei spurde i undersøkinga.

– Evige sanningar

NRK var på pasjonsgudstenesta i Kristiansand domkyrkje langfredag. Der møtte vi familien Jakobsen. Dei hadde prioritert å dra ned frå påskefjellet, for å feire kyrkjepåske.

– Her er det nokon evige sanningar som framleis trengst og framleis verkar. Og som blir opplevd relevant både når verda er trygg, og når verda er utrygg, sa Martin Jakobsen da.

Ekteparet Hans og Elin Kyllingstad er også blant dei som trur på Jesu oppstandelse.

– Det er det som gjer at vi har håpet, at Kristus er oppstått. Det gir håp for oss menneske, men også for det vi ønsker her i verda. Med fred og forsoning, sa Elin Kyllingstad.

Kontrastfylte dagar

Prest Iselin Jørgensen i Kristiansand domkyrkje meiner kontrastane frå liding og død på langfredag til oppstandelsen på påskedag viser igjen utanfor kyrkja.

– Vi får vere med på den store transformasjonen, frå død til liv. Og naturkreftene er på vår side. Vi lever ein stad i verda der naturen rundt oss er med på denne rørsla. Knoppane spring og frø veks opp frå jorda, seier Jørgensen.

– Vi trur på ein skapargud som nettopp står bak heile forvandlinga til naturen. Og vi trur på ein kosmisk gud som er med oss i det store bildet, legg ho til.