Luftåtak mot Ukraina: – Eit av dei større

Russland sende kring 120 missil og 90 dronar inn i Ukraina natt til i dag. Det skriv landets president, Volodymyr Zelenskyj, på Telegram søndag morgon.

Det blei høyrt fleire eksplosjonar i hovudstaden Kyiv i morgontimane. Det er også meldingar om åtak mot fleire stadar over heile Ukraina.

– Eit av dei større luftåtaka vi har sett, skriv den ukrainske utanriksminister Andrij Sybiha på X.

Det polske militæret skriv i ei melding på X søndag morgon at dei aktiverer fly for å sikre luftrommet etter dei russiske angrepa.

– Alarmen har gått i heile natt

– Vi har vore i eit bomberom i Kyiv heile natta, seier Ingrid Joys, som er generalsekretær i bistandsorganisasjonen Caritas Noreg.

Dei er der for å hjelpe lokalbefolkninga med mellom anna feltkjøkken og reinsing av vatn.

Joys har vore i Ukraina for å sjå til bistandsprosjekta dei har langs fronten. Ukrainarane førebur seg på ein veldig hard vinter, fortel ho.

– Flyalarmen gjekk då vi kom tilbake frå frontnære område i går ettermiddag. Vi fekk informasjon om at det kom til å vere massive angrep i løpet av natta. Det stemte godt, for alarmen har gått i heile natt, seier Joys.

Ho seier også at dei har høyrt luftforsvaret slå inn. Det er første gong ho har høyrt slike smell, fortel ho.

– Når ein reiser inn i Ukraina, veit ein at det er eit land i krig. Det å vere i bomberom opplevast ganske trygt, men det blei ei ekstra omdreiing når ein høyrer missil og treff, seier Joys, som seier det heile var ubehageleg.

Zelenskyj: – Infrastruktur var målet

Den ukrainske energiministeren seier at Russland har angripe fleire kraftstasjonar fleire stadar i Ukraina. Straumen har blitt skrudd av i tre regionar i landet, ifølge nyheitsbyrået AFP.

Reuters skriv at fleire kraftverk er råka, fleire av dei tilhøyrer landets største private energiselskap DTEK.

Dei har ikkje spesifisert kva for utstyr eller delar av kraftverka som blei trefte. Tilsette arbeidar med å reparere skadane.

President Volodymyr Zelenskyj skriv i meldinga på Telegram at målet for dei russiske åtaka var energiinfrastruktur.

Han skriv og at to personar er drepne og fleire såra etter åtaket. Reuters skriv at to tilsette ved jernbanen i byen Dnipro skal vere drepne. Tre skal også vere skadd. Tala er ikkje bekrefta frå andre kjelder.

Fleire byar råka

Ordførar i Kyiv, Vitalij Klitsjko, skriv i ei melding på Telegram at det har falt restar frå rakettane fleire stader i området rundt hovudstaden.

Ifølge Kyiv Independent er det høyrt eksplosjonar i byane Kropyvnytskyi, Rivne, Ivano-Frankivsk, Cherkasy, Dnipro, Vinnytsia, Kryvyj Rih, Odesa og Zaporizjzja.

I Rivne er kritisk infrastruktur også råka, skriv Reuters, som siterer guvernøren i byen.

Sjølv om missilåtak er vanleg i utkanten av Ukraina, er det ikkje vanleg at dei ukrainske byane blir trefte av slike åtak.