Låg og sov to meter unna der 146.000 ampere slo ned i huset

– Du ligg litt over senga di. Du skjønar ikkje heilt kva som har skjedd.

Søndag morgon vakna Mads Ramstad og kona Anine Kongshavn av eit kraftig smell. Dei gjekk ut av soverommet og såg glasbetar i gangen.

– Vi lurte på om det var ei bombe. Så lukta vi røyken og då ringde vi naudetatane.

Klokka 06.40 den morgonen sende politiet ut melding til pressa om at dei rykka ut til meldingar om lynnedslag i fleire hus nord i Haugesund.

Særleg eit hus hadde fått store skader.

Mads og Anine sitt.

– Det var ganske heftig å sjå stova si full av glasskår. Øydelagt og knust, seier Ramstad.

Ruta i døra som går inn til stova er knust.

Alt elektrisk i huset er øydelagt. Her er støpselet i stova blåst ut av veggen.

På motsett vegg fleire meter frå der lynet slo ned har tapetet fått synlege skadar.

Inni veggen er det synlege skadar. Ramstad er takksam for at det ikkje byrja å brenne.

Toppen på pipa ligg fleire meter frå huset, nede på ein grasflekk like ved ein gangveg.

Dei hadde sove vegg i vegg.

– Og vi kom uskadde frå det. Vi er veldig glade for at det ikkje tok fyr, seier han.

Tre dagar seinare er det sett opp ein lettvegg i stova som skal halde taket oppe. Det luktar svidd, støpsla har blåst ut av veggen, eit stovevindauge er knust. Og pipa har delvis rast ned.

På veg ned til kjellaren må ein prøve å ikkje trø på glasbetane. Den nye inspeksjonsluka i pipa blei blåst tvers over rommet og trefte kjøleskapa som står att med tydelege bulkar.

For det var ikkje eit «normalt» lyn som slo ned i huset.

• Kvifor lyner det og kor kjem buldrelydane frå? Det kan du lese meir om her.

Eit uvanleg lynnedslag

Statsmeteorolog Kristian Gislefoss har studert lynnedslaga som trefte bustadområdet i Haugesund.

Straumstyrke blir målt i ampere.

Til dømes bruker ein brødristar 30 ampere.

Startmotoren til ein bil brukar opp til 160 ampere.

Ifølge Gislefoss har eit lynnedslag vanlegvis 10.000 ampere.

Lynet som trefte huset til Ramstad hadde 146.000 ampere.

– Det er ikkje ofte vi ser så kraftige lynnedslag, seier statsmeteorologen.

– Kvifor blei dei så sterke?

– Det er vanskeleg å seie. Vanlegvis går dei kraftigaste lyna frå sky til sky, ikkje dei som går ned i bakken. Så dette var eit unntak.

• I fjor kosta ekstremvêr 3,5 milliardar kroner.

Gode naboar

Forsikringsselskap og takstbyrå er i gang med å få oversikt over skadane.

Det er lenge til paret kan flytte heim igjen.

I mellomtida er det fint å kjenne på godt naboskap.

– Det betyr utruleg mykje at vi har fått husrom hos ein nabo. Andre har tilbode frukost, og vi har fått kaffikanner på døra. Det er slike ting som betyr mykje, seier Mads Ramstad.