La opp for fire år sidan – lanserer Marte (28) som OL-kandidat

20 hours ago 3



– Det er ein bra gjeng, altså. Fy fader.

Føtene hamrar taktfast mot asfalten og sveitten dryp i over 30 varmegrader.

Dagens andre løpeøkt består av 20 kilometer i høgt tempo, men Marte Mæhlum Johansen lyser opp etter fleire trøblete år.

Nå er kvardagsgleda omsider tilbake. Idrettsgneisten er tent.

– Å kunne stå opp og gle seg, det er jo ei litt ny verd, seier 28-åringen til NRK og smiler.

– Eg kjenner jo nå at eg får litt same kjensla tilbake som eit bra skirenn, fortset ho.

en kvinne med solbriller

IMPONERER: Marte Mæhlum Johansen har senka den personlege rekorden sin på maratonar med nesten 13 minutt på eit halvt år.

Foto: Jørgen Ryggvik Karlsen / NRK

Ho var den beste langrennsløparen i verda som junior. Til liks med langrennsstjerna Johannes Høsflot Klæbo var ho uslåeleg og eit stort framtidshåp i norsk langrenn.

Men der stoppar også likskapane.

– Kjente meg som ein dårleg person

Langrennshåpet presenterte seg tidleg på den internasjonale scena som dobbelt juniorverdsmeister, seinast i 2017 da Toten-utøvaren utklassa den svenske VM-dronninga Ebba Andersson.

På vegen mot draumen om OL-gull gjekk ho gradene via juniorlandslag til rekruttlandslag, men åra etter gulla i junior-VM og U23-VM blei tunge.

en person som går på ski på snøen

STORTALENT: Marte Mæhlum Johansen var eit av dei største langrennstalenta i verda. Her frå NM i Alta i 2018.

Foto: Terje Pedersen / NTB

Idrettsgleda forsvann. Gleda blei erstatta av mørke, negative tankar som påverka den psykiske helsa.

– Eg sleit veldig med at om eg ikkje var i god form, så kjente eg meg som ein dårleg person. Om eg hadde ei dårleg økt, så var dagen øydelagd.

Ho oppsøkte psykolog og fortel at ho hadde bra utbytte av samtalane, men motivasjonen dalte og hausten 2021 bestemte ho seg for å gi opp langrennsdraumen.

– Det var hardt og brutalt å innsjå at det ikkje blei ein langrennskarriere.

Ho fortset:

– Eg fekk ei identitetskrise. Eg hadde jo drive med langrenn sidan eg var lita jente. Da eg innsåg at det ikkje var liv laget, så var det eit stikk i hjartet.

Nå vekker ho oppsikt og overraskar med ambisjonar i ein annan idrett.

Løyperekord

I fjor haust melde ho seg på sitt første løp og fullførte Oslo Halvmaraton.

Opplevinga gav meistringskjensle og meirsmak. Derfor bestemte ho seg for å melde seg på maraton på seinhausten i Valencia.

I sin andre maraton sette ho løyperekord i Midnight Sun Marathon, og i sin tredje maraton blei ho beste kvinnelege europear i Hamburg med tida 2:34.54 – kor ho senka den personlege rekorden sin med nesten 13 (!) minutt på eit halvt år.

Maratontida er den raskaste tida sprungen av ei norsk kvinne i år, og den fjerde beste tida av ein norsk kvinneleg utøvar dei siste fem åra.

Noregsrekorden på maraton for kvinner er 2:21.06, sett av Ingrid Kristiansen i 1985.

En gruppe mennesker som løper

IVRIG: Marte Mæhlum Johansen (t.h) omtaler seg sjølv om ein ivrig løpar, men vil bryte eigne maratonbarrierar. Her er ryggen til trenar Kristian Ulriksen.

Foto: Jørgen Ryggvik Karlsen / NRK

– Eg hadde ikkje sett for meg at eg kunne senke personleg rekord så mykje. Så det var over all forventning og ei positiv overrasking.

– Det har vore ein veldig rask framgang og progresjon. Mykje av det er nok på grunn av langrennsbakgrunnen. Når eg først bestemmer meg, så er eg veldig dedikert og veldig fokusert, forklarer ho.

– Det som er imponerande, er dei løfta ho har tatt i år. Nå har ho lagt inn meir trening og fått eit veldig løft. Det er imponerande, og det er ingenting som tilseier at det skal stoppe der, meiner NRKs friidrettskommentator Jann Post.

For i vinter tok Mæhlum Johansen treninga eit steg vidare da ho begynte å systematisk jobbe med Kristian Ulriksen som trenar.

en mann med solbriller

TRENAR: Kristian Ulriksen er trenar til Marte Mæhlum Johansen

Foto: Jørgen Ryggvik Karlsen / NRK

– Eg trur ho kan springe maraton på 2.25.00. Om ho kan springe raskare enn det står att å sjå. Dei som kan bli veldig gode, har ei veldig bratt kurve ganske lenge. Så dersom ho tar det neste steget ned til 2.29.00, så er det mogleg ho kan springe raskare enn eg trur, seier Ulriksen.

Meiner barnehagejobb viser potensialet

I motsetning til da ho satsa på langrenn, lever ho på ingen måte eit toppidrettsliv med løpinga. Supermosjonisten gjennomfører arbeidsdagen i barnehagejobb ved sida av nærare 40 treningstimar i månaden.

– Det er veldig hyggeleg, men det er ikkje optimalt. Eg har ikkje vore sjuk ennå, bank i bordet, og til så lenge så blir det sånn, seier ho.

– Andre toppidrettsutøvarar tar ungane ut av barnehagane. Det aller siste dei ville gjort, er å jobbe i ein barnehage med titals bakteriebomber rundt deg kvar einaste dag. Det viser at det er eit enda større potensial, seier Post.

Jann Post

EKSPERT: NRKs friidrettsekspert Jann Post meiner Marte Mæhlum Johansen kan bli ein meisterskapsløpar i friidrett for Noreg.

Foto: Celina Øier, NRK

Med dedikasjon, stor motivasjon og evne til å halde seg skadefri, trenar ho ofte både før og etter jobb, og nå har ho peika ut eit nytt maratonmål.

– Nå skal eg springe i Berlin i september, og da blir målet å komme seg under 2.30.00. Så vi får berre sjå kor langt under 2.30.00 som er mogleg.

Blir lansert som OL-kandidat

– Det er ei spennande reise for ein langrennsløpar som gav seg fordi ho ikkje fekk det til å fungere, til å kunne bli ein meisterskapsløpar i friidrett. Dersom ho spring under 2.30.00, kan ho delta i EM for Noreg, seier Post.

Dersom ho spring under 2.30.00 i Berlin, samtidig som Karoline Bjerkeli Grøvdal ikkje spring under to og ein halv time, vil Mæhlum Johansen vere den første norske kvinna som spring under 2.30.00 sidan 2008, da Kirsten Melkevik Otterbu sprang på tida 2.29.40.

EM-kravet på maraton tidlegare i år var 2.33.00, og Ulriksen støttar Post i at eleven på sikt kan representere Noreg i internasjonale meisterskapar.

– Jaja, om ho gjer ein god jobb nå, så har ho ein bra sjanse til å springe VM i Beijing i 2027 og OL i Los Angeles i 2028, seier Ulriksen.

Han fortset:

– Det å komme dit ho er i dag, det hadde ho klart uansett. Men dei neste ti minutta er jo dei som blir vanskelege.

– Det hadde vore dødskult å springe for Noreg i meisterskap. Så det får vere ein litt sånn hårete draum, seier ho og smiler, og trekker fram ønske å vere ein rollemodell for fleire kvinner til å springe han lengste distansen.

– Eg håpar fleire jenter blir med på den maratonbølga, og eg håpar at eg kan vere med å inspirere og motivere spesielt fleire damer til å springe.

Er det greit å jogge i baris? 01:18

Publisert 30.07.2025, kl. 19.23

Read Entire Article