Konspirasjonteoretikar tapte nettstad til satiremagasin

Etter å ha kalla skuleskytinga på Sandy Hook for ein «bløff, skuldar konspirasjonsteoretikaren og høgreekstremist Alex Jones over 1 milliard dollar i erstatning til familiane til ofra.

Jones slo seg sjølv konkurs knappe to månadar etter Sandy Hook-dommen.

No har familiane til ofra hjelpt satiremediet The Onion med å kjøpa Jones' nettstad InfoWars på ein konkursauskjon, skriv AP.

InfoWars under Alex Jones' styre er dermed historie.

– Døden til InfoWars er rettferda me lenge har venta på og kjempa for.

Det seier Robbie Parker som mista dottera si Emilie i massakren i Connecticut i 2012, ifølge advokaten hans.

Stadfestar kjøp

Jones stadfesta The Onions oppkjøp av InfoWars på sosiale meidum. Han seier han planlegg å utfordra nedlegginga, melder AP.

– Eg veit ikkje kva som skjer, men eg skal vera her til dei skrur av lyset, seier Alex Jones i ein video publisert på nettsida, og legg til at kjøpet «er eit angrep på ytringsfridomen».

Torsdag kveld norsk tid er nettsida ute av drift.

The Onion har base i Chicago og er leia av Bryce P. Tetraeder. Mediet er kjende for å gjera narr av konspirasjonsteoretikarar som Alex Jones.

I ei pressemelding på nettstaden skriv han følgande om kjøpet – med ei viss ironisk distanse:

«InfoWars har gjennom alt vist ei urokkeleg vilje til å skapa sinne og radikalisera samfunnets mest sårbare – verdiar som djupt resonnerer med oss alle i Global Tatrehedron.»

The Onion planlegg å lansera InfoWars på nytt i januar, som ein parodi på seg sjølv, skriv New York Times.

Advokatar for familiane i Sandy Hook-saka har uttala at dei samarbeidde med The Onion for å kjøpa Infowars, opplyser AP.

Kalla massakren ein «bløff»

Jones grunnla InfoWars i 1999, og har brukt nettstaden til å spreie konspirasjonsteoriar og falske nyheiter.

I årevis påstod han at skulemassakren på Sandy Hook-barneskule var oppspinn og iscenesett av våpenmotstandarar, før han i retten til slutt innrømma at påstandane var usanne.

Fleire av dei pårørande til ofra saksøkte Jones og selskapet hans for ærekrenking og psykisk belastning på grunn av dette.

I retten vitna fleire om at dei blei traumatiserte av konspirasjonsteoriane til Jones og at dei fekk trugslar frå tilhengarane hans.