Gullfeber i Bergen: – Vi må ikkje «jinxe» dette

– Det er ingen tvil om at temperaturane er stigande i Bergen no. Vi har jo fått eige gulløl allereie, seier ordførar Marit Warncke (H) i Bergen kommune.

Etter kampane i helga, ligg Brann og Bodø/Glimt likt på tabellen, begge med 55 poeng, men ikkje likt på målforskjell.

Brann er difor framleis nummer to, men likevel har bergensarane fått stjerner i augo, og større håp om at «gullet kjem til å kome».

Lokale bryggeri produserer alt «gullet skal hem»-øl.

– Det er det som er så fantastisk med Bergen, at vi er veldig flinke til å ta sigeren på forskot. Om det ikkje skulle gå vegen, så har vi iallfall hatt festen, seier ordføraren.

– Luktar på gullet

Førebels står det att tre kampar for Brann i serien. Mot Lillestrøm på heimebane laurdag, på bortebane mot Molde den 23. november og på heimebane mot Viking den 1. desember.

Dei siste heimekampane blei utselde på få minutt.

– Det er mykje som skal klaffe i innspurten, det er tre kampar igjen, men no luktar vi jo på gullet, så eg trur Bergen er i stand til å skape ein fest rundt den siste innspurten, seier Warncke.

Ordføraren seier kommunen har måtte begynne å tenke på korleis eit gull skal feirast.

– Tanken er at vi må få til ein folkefest i byen, men ikkje nødvendigvis at det er kommunen som gjer dette åleine. Så det må vi finne ut av. Vi har begynt å tenke på det.

– Så det blir ikkje auke i eigedomsskatten i Bergen, for å få til gullfest?

– Nei. Det kan eg garantere, at det blir det ikkje.

Gullfeber i bryggeria

Bergens Tidende var først til å skrive at det kjem gull-øl frå Hansa Borg bryggerier, og tidlegare har både Bergensavisen og Bergens Tidende skrive at 7 fjell bryggar øl med ekte gull.

Paal Davanger er eigar av Fotballpuben i Bergen og ser fram gullfest.

– Vi må ikkje «jinxe» dette her, men det er klart, vi er jo bergensarar, og vi nærmar oss.

Samtidig som bryggeria i Bergen kokar, har lokalbryggeriet Bådin Bryggeri i Bodø sagt til VG at dei «som vanleg» har fylt opp tankane med gullpils. Ifølge VG blir det derimot ikkje gulløl frå Nordlands pils, for Ringnes meiner dei ikkje har lov til å produsere det.

Og no blir det Hansa-gulløl på fat og tapp, og ikkje på boks i butikk, slik det blei i 2018.

Davanger innrømmer at han er «littegranne redd» for at ølproduksjonen no vil jinxe gullet.

– Eg synest dei skulle kanskje ha venta ein kamp til.

Lengtar etter gull

I bybilete i Bergen er det også håp om gull. Brannsupporter Rolf Myrvågnes kjenner på aukande feber og lengt etter gull.

– No er det plutseleg eit håp som ingen hadde ant, berre for nokre få veker sidan. Det er ei ny og fin kjensle, seier Myrvågnes.

RBK-fans Geir Slørdahl og Roger Tømmevold synest det er hyggeleg at laget deira kunne bidra litt til gullfeber i Bergen, då Rosenborg slo Bodø/Glimt.

Dei unner bergensarane å snappe gullet frå Bodø/Glimt.

– I år heiar vi på at gull-ølet skal kome på tapp i Bergen, seier Slørdahl.

– Det er greitt å begynne å tappe litt øl og vere førebudd, seier Tømmervold.

Men, brannsupporter Hans Jørgen Grov, torer ikkje håpe for mykje.

– Eg håpar, men eg er litt redd også. Eg trur nok Bodø/Glimt er for gode.

Håp i kvar drope

At det blir spanande framover er heilt sikkert, for Viking ligg for tida på tredjeplass på tabellen, med 50 poeng. Kan dei ta att «raudtrøyene»?

– Vinn dei begge kampane og heng etter, så blir det ein j**la tøff kamp, siste kampen heime, seier Davanger.

Kven som faktisk vinn serien, blir klart i desember. Gulløl blir det uansett.

– Vinn vi no over Lillestrøm, kan vi selje det gullølet berre med å ta den andreplassen. Det er jo nesten som eit seriemeisterskap, det å kome til Champions league-kvalifiseringa, seier Davanger.