Golberg svarer på Northug-utspel: – Parodi og katastrofe

– Det hadde vore parodi og katastrofe, seier Golberg til NRK om tankane som har blitt lufta i norske medium den siste tida.

Det starta med eit utspel frå Petter Northug sjølv:

– Eg burde gå den lagsprinten i VM. Det kan du sitere meg på. I dag er Erik Valnes nummer éin og eg nummer to for å gå lagsprint med Klæbo i VM, men ting kan skje. Det er sånn i boka mi, sa 38-åringen i eit VG-intervju 16. august.

– Eg hadde ikkje klart å sette Klæbo i ein dårleg situasjon, spesielt viss du tenker på det eg gjorde i NM del to. Viss eg hadde fått beskjed om at eg skulle gå den første etappen, så skulle eg faen meg ha laga eit sirkus ein siste gong i Granåsen, la han til med eit smil.

«Gi gåva som Northug fortener»

Petter Northug har 13 VM-gull på merittlista frå før. Men om han kjem til start under VM i Granåsen i februar neste år, vil det vere ti år etter at han vann sitt hittil siste VM-gull, femmila i Falun i 2015. Sist han var i aksjon i ein meisterskap, var VM-femmila i Lahti 5. mars 2017.

Etter nokre turbulente års fråvær frå sporten, starta Northug ei satsing mot langløp for to år sidan.

Nå har han altså bestemt seg for òg å gjere eit siste krumspring i tradisjonelt langrenn, og stiller til start i den nasjonale sesongopninga på Beitostølen i håp om at det kan vere første steg på vegen mot eit VM på heimebane.

Allereie i februar tok Northugs gode venn, tidlegare TV2-journalist Ernst A. Lersveen, i ein kommentar i Nettavisen til orde for at Northug burde få friplass på VM-femmila.

«Derfor, Nossum og dykk andre som bestemmer uttak: Tør de ta sjansen? Gi gåva som Northug fortener!», skreiv han.

Sundby: – Ein fantastisk idé

Etter Northugs eige utspel i august, gjekk Martin Johnsrud Sundby ut i VG og sa at han trudde det «hadde skapt eit veldig engasjement, sirkus og merksemd for langrenn om Northug allereie no blei tatt ut til å gå lagsprinten i VM saman med Klæbo».

– Så det er mange gode grunnar til at det er ein fantastisk idé, bortsett frå dei andre løparane som vil kvalifisere seg til den etappen. Dessverre er det fem-seks andre som går fortare enn Petter på papiret, dei vil føle at dei ikkje blir tatt på alvor, sa Sundby i intervjuet.

Det er tankane om at Petter Northug burde få ein snarveg til VM, enten det er på femmila eller lagsprinten, som får Pål Golberg til å bruke ord som «parodi og katastrofe».

Han er heilt tydeleg på at Northug må kvalifisere seg på same måte som alle andre.

– Eg håpar jo inderleg at Petter går så fort at han går seg inn i ein diskusjon, men det begynner å bli nokre år sidan 2015. Men han er velkommen til å bli med på hardøkter i Oslo. Eg sender invitasjon, seier Golberg til NRK etter å ha sprunge inn til tredjeplass på 10 km under Norgesløpet på Jessheim laurdag.

Når NRK konfronterer Northug med orda Golberg vel, svarar han:

«Same som han under VM i Val di Fiemme. Berre enda verre da.»

Han sikter til VM-lagsprinten i 2013, då Northug og Golberg gjekk på Noregs lag – og Golberg kollapsa.

– Mange folk uansett

Golberg deler Northugs synspunkt om at Erik Valnes per nå er den som på papiret ligg best an til å få gå lagsprinten med Johannes Høsflot Klæbo i Granåsen, men har ikkje Northug som det neste namnet på lista.

I staden peikar han på seg sjølv og Harald Østberg Amundsen som dei neste kandidatane. Kanskje ikkje så rart, tatt i betraktning at nettopp Pål Golberg var den som gjekk saman med Klæbo da Noreg vann eit suverent gull på lagsprinten sist det var VM, i Planica i 2023.

Golberg er ikkje ueinig i Sundbys argument om at det ville skapt engasjement og sirkus med Northug til start, men seier:

– Eg trur det kjem mange folk til VM uansett.

I VG-intervjuet bruker Martin Johnsrud Sundby dalande interesse og mangel på profilar i langrenn som eit argument for å gjere vegen tilbake til VM-løypene lettare for Northug.

– I gamle dagar var det bra nok med «Gutta på tur», no manglar vi dei utøvarane som seier noko så vi set kaffien i halsen. Vi har folk som har vunne «hundre verdscuprenn» som likevel går under radaren, sa Sundby.

Bekymra for sponsorflukt

Golberg, som sjølv har 52 pallplassar i verdscupen, meiner at dagens toppløpar byr nok på seg sjølv.

– Men det er klart, det er knallhard konkurranse. Vi har nordmenn som er verdas beste i dei største idrettane i verda. Det var definitivt ikkje tilfellet når Marit Bjørgen og Bjørn Dæhlie heldt på i si tid, påpeikar han.

Pål Golberg er likevel bekymra for fallande interesse, og ikkje minst sponsorflukt. I fjor mista langrennslandslaget sin store avtale med Norengros. Etter VM takkar Sparebank 1 og Equinor for seg.

Men å gi Petter Northug gratisbillett til VM-deltaking, er ikkje ei løysing femmilsverdsmeisteren frå Planica trur på.

Det avviser også landslagssjefen at vil hende.

– Vi kjem ikkje til å ta ut Petter Northug på førehand til VM. Våre tradisjonelle «sesonginformasjonar» vil vere klare og godkjende som vanleg i midten av oktober. Der vil kriterium for uttak til verdscup og VM framgå. Det er i aller fyrste rekkje resultat i verdscupen som kvalifiserer for VM, seier Ulf Morten Aune til NRK.