Frosta-legen erkjenner delvis straffskyld

Den tidlegare kommuneoverlegen i Frosta er tiltalt for å ha valdtatt 88 kvinner. Totalt har 95 kvinner status som fornærma i tiltalen.

Onsdag blei det klart at han erkjenner straffskyld for delar av tiltalen.

Det bekreftar den tidlegare kommuneoverlegen sin forsvarar, Erlend Hjulstad Nilsen, i ein e-post til NTB.

– Det er nå gjennomført avhøyr av vår klient der han har erkjent straffskyld for tre tilfelle av valdtekt fordi fornærma i rettsleg forstand har vore ute av stand til å motsette seg handlinga, skriv Hjulstad Nilsen til NTB.

I tiltalen har totalt 95 kvinner status som fornærma. Bye er tiltalt for å ha misbrukt sin stilling for å oppnå seksuell omgang med alle av disse.

– Vidare har han erkjent til saman 40 tilfelle av misbruk av stilling til å oppnå seksuell omgang, skriv Hjulstad Nilsen.

Har tidlegare nekta straffskyld

Bye har heilt fram til no nekta straffskyld.

Til NTB skriv forsvararen at det er først no Bye har forklart seg om enkeltsaker.

Ifølge forsvararen er grunnen til det at mange av forhalda ligg langt bak i tid.

– Av den grunn har det forut for avhøyr vore naudsynt å gjennomgå eit svært omfattande bevismateriale. Det er årsaka til at det først på noverande tidspunkt er forklart seg i enkeltsaka, skriv Hjulstad Nilsen.

Nye avhøyr denne veka

Sist onsdag var Bye inne til nye avhøyr hos politiet.

Bye sin forsvarar, Erlend Hjulstad Nilsen, bekrefta at det ville bli gjort nye avhøyr denne veka.

– Det vil bli gjort nye avhøyr neste veke. Tema i avhøyra har blitt formidla i ein tidlegare pressemelding, sa Hjulstad Nilsen til NRK da.

Da tiltalen i saka blei klar uttalte Hjulstad Nilsen i ei pressemelding at spørsmålet om straffskyld ville bli tema i komande politiavhøyr.

– Når det gjeld spørsmålet om straffskyld, blir dette eit tema i komande politiavhøyr, sa Erlend Hjulstad Nilsen til NTB.