Fleire unge går i kyrkja: – Det er forbløffande

NRK har møtt han og fleire av venane hans i Vereide kyrkje, som ligg eit steinkast ifrå Nordfjordeid folkehøgskule.

Ifølgje Johannes er det eit fåtal av dei 120 elevane på skulen som ikkje er religiøse.

Noko av det han setter mest pris på med religion, er fellesskapet han har i trua saman med andre.

– Forbløffande tal

Ifølgje nye tal frå Statistisk sentralbyrå (SSB), vart det arrangert færre gudstenester i 2024, men antal deltakarar har gjennomsnittleg auka frå 77 til 80.

Kyrkjerådsleiar, Harald Hegstad, seier at det er forbløffande gode tal, og gledeleg for Den norske kyrkje.

– Me er vant til ein søkkande trend. No ser det ut til å flate ut, og kanskje gå oppover. Det kan vere på grunn av den usikre tida me er i no.

I tillegg til det generelle auke er det ein annan bølgje på gong, som dei ikkje har observert før. Altså at unge vaksne melder seg inn i kyrkja.

Kvar femte innmelding i Den norske kyrkje består av folk i alderen mellom 25–34 år.

Til saman var det 750 nye medlem i denne demografien i 2024. Det er ei tredobling i samanlikning med 2015.

– Dei unge er meir sensitive for endringar som skjer i samfunnet. Dei eldre blir kanskje ikkje råka i like stor grad, seier Hegstad.

– Treffer noko hjå unge menn

Kyrkjer, og trussamfunn over heile Noreg merkar ei auke iblant unge generelt. Nokon av dei har spesielt lagt merke til at det gjeld unge menn.

Denne trenden har religionsforskaren, Lars Laird Iversen, bete seg merke i.

– Det er fleire i forskarmiljøet som har sett koplinga mellom unge menn, og ei ny interesse for religion og kristendom, men vi veit ikkje kvifor enda.

– Det er interessant at me kan sjå fleire unge menn som er interessert i religion. Det er noko me ikkje har sett før.

No er det fleire søknadar inne for å forske vidare på dette fenomenet.

– Det har jo vore populært med sjølvutvikling og optimalisering. At unge menn prøver å bli den beste versjonen av seg sjølv. Det kan vere ein av grunnane.

For Johannes handlar det ikkje om sjølvrealisering eller optimalisering. For han handlar det om meininga med livet.

– Eg trur fleire har begynt å leite etter svar. Tidlegare har folk hatt ein tryggleik i at verda berre blir betre og betre. No ser det kanskje ikkje sånn ut lenger.