– Eg veit korleis det er å vere gal

1 week ago 13

Sturle Kvilekval er godt kjent med det meste av rusmiddel.

I nærmare 20 år var Fjorden Baby-vokalisten avhengig av harde narkotiske stoff og alkohol.

No fortel han om skuggesida ved rockestjernelivet han så gjerne ville leve, og om bakgrunnen for det nye albumet som ingen i bandet trudde dei ville få lage.

– Eg trur det er riktig av meg å fortelje dette no. Folk skjønte eg var på dødens rand i fleire år. Det heldt på å gå skikkeleg gale med meg.

Draumen om eit «rockeliv»

Vokalisten frå Loddefjord i Bergen blei tidleg introdusert for både alkohol og narkotika.

Han hadde lenge hatt ein fascinasjon med rockestjernelivet, og han drøymde om å bli eit ikon.

Då bandet slo igjennom, omfamna han for alvor alt som han meinte høyrde med til rockelivet.

– Vi fekk alt gratis fordi vi spelte i band. Vi fekk alkohol, folk på byen ville gi oss ei stripe med kokain eller ecstasy, kva som helst, seier Sturle.

Men rockedraumen kosta. Sturle hamna stadig meir på køyret.

Bandet kollapsa, det var umogleg å samarbeide.

– Det blei verre for meg utan bandet i ryggen. Eg gjekk berre og rava rundt for meg sjølv i byen, seier Sturle.

Treng du nokon å snakke med?

Mental Helse sin hjelpetelefon: 116 123 (døgnopen)
Kirkens SOS: 22 40 00 40 (døgnopen)
Rusinfo: 915 08 588.
Sidetmedord-chat (døgnopen)
Kors På Halsen: 800 333 21 (Chat er open alle dagar 14-22, telefon er open kvardagar 16-22)

I dei verste periodane levde han i ein slags alternativ verkelegheit inne i sitt eige hovud.

Hallusinasjonar og forfølgelsesvanvidd blei ein del av kvardagen.

– Eg trudde at eg levde i eit «Truman-show», og at plateselskapet Sony overvaka alt eg gjorde og lagde film om det, seier Sturle.

– Det var heilt kaos i hovudet mitt. Eg var skikkeleg gal.

Og så, i september 2018, toppa det seg.

Overlevde

«Det var nære på noen gonger», syng Sturle i tittelsporet på Fjorden Baby sitt splitter nye album, Rockebyen.

Like ved øvingslokalet blir vokalisten dagleg minna på kor nære på det faktisk var.

I 2018 blei han plukka opp av fjorden etter eit sjølvmordsforsøk

– Det var for intenst oppe i hovudet mitt. Eg ville berre døy.

Trass psykosen, hugsar han hendinga. Nokre dagar tidlegare hadde han bestemt seg for å stoppe rusbruken tvert.

Han hallusinerte, hadde spasmar i kroppen og sov ikkje på dagevis.

Han hugsar det var dårleg vêr, og at han trudde det var han som gjorde at det lyna og tora.

Og han hugsar at han svømte mot land.

– Eg merka at eg overlevde, så eg ropte etter hjelp. Då stod det ein politibil på kaia. Om det var tilfeldig, veit eg ikkje.

Fann kjærleiken

Vegen ut av det destruktive rockelivet har vore lang.

Sturle var innlagd på psykiatrisk avdeling fleire gongar. Kvar gong han kom ut, gjekk han rett tilbake til rusen. Han visste ikkje korleis han skulle leve eit anna liv.

– Eg romantiserte ein destruktiv livsstil i mange år. Det heldt på å øydelegge meg. No er eg ferdig med det.

No har han vore rusfri i fire år.

– Kva var det som gjorde at du klarte det denne gongen?

– Eg fann kjærleiken. Ho redda livet mitt. Og så kom bandet saman igjen. No har eg fått eit heilt nytt syn på livet.

Det var ingen i bandet som hadde trudd at dei skulle komme tilbake til der dei er i dag.

– Det var ikkje gitt at han skulle overleve den kombinasjonen med psykisk sjukdom og rus som var ganske heavy. Det hadde vi nok med oss, seier Kjetil Grimsby Haarr.

Bassisten har sjølv måtta følge kompisen til Sandviken sjukehus for å bli innlagd. Det var vondt å sjå kor sjuk han var.

– No er vi veldig glad for å ha han tilbake i denne verda. Han er så fin og trygg i seg sjølv. Han er ein god pappa og ein strålande bandkamerat.