Donald kjem til Jotunheimen: – Skikkeleg artig

– Dette synest eg er skikkeleg artig. Eg er så æra over å vere ein figur i Donald Duck.

Det seier Solbjørg Kvålshaugen, som er styrar ved DNT-hytta Fondsbu i Jotunheimen.

Ho har nemleg fått ein heilt eigen karakter i det nye Donald-bladet, som blir lansert i dag.

– Eg har vore Donald Duck-fan sidan eg var bitte liten. Så fort eg lærte å lese, byrja eg å lese Donald.

Songen er med

Kvålshaugen er mellom anna kjend for å synge for gjestene som kjem til Fondsbu.

Eller «Andsbu», som hytta heiter i bladet.

I Donald-historia syng karakteren hennar Solbjørg Skrålshaugen så høgt at heile staden blir gravlagd av eit snøskred.

– Det er skikkeleg artig å bli profilert på den måten, seier ho.

La historia til Jotunheimen

Donald tek seg ein tur til Noreg omtrent ein gong i året, ifølgje Donald-redaktør Marius Horn Molhaug.

– Men dette er første gang han er i «Fjontunheimen», seier han.

Det er Donald-forfattar Christian Kjelstrup som har skrive utgåva.

Det er ein god grunn til at historia er lagt til nettopp den norske fjellheimen.

Som gut hadde forfattaren nemleg to interesser, seier han:

Fjellturar og Donald.

No har han slått dei saman i si siste utgåve av bladet, som kjem ut kvar veke.

– Noreg er eit så vakkert land, og for meg er Jotunheimen noko av det flottaste.

I 2023 var Donald på besøk i hovudstaden.

Då møtte han elg i sporet då han tok T-bana til Fjollenkollen i Fjonslo. Hovudstaden har òg B-gjengen besøkt i si tid, i eit forsøk på å rane Skunchmuseet for det verdenskjende maleriet «Snik».

I denne utgåva, som har fått namnet «Kappløp mot Kaldhøpiggen», skal Donald og nevøane ut på ein redningsaksjon i «Fjontunheimen» for å finne Solbjørg sin kjærast.

Og leiteaksjonen går gjennom stader som «Gjesseggen» og «Glattetind».

Bladet skal kome ut i fleire europeiske land.

– Då må ein ha andre ordspel som er tilpassa dei ulike språka, seier han.

– Det blir ein bonus for norske lesarar å forhåpentlegvis kjenne att norsk natur og litteratur.

• Den første utgåva av Donald Duck i Noreg kosta 50 øre. Det var ikkje akkurat det den same utgåva vart selt for i 2014.

Òg inspirert av Peer Gynt

Sjølv likar forfattaren godt å ta båten M/B Bitihorn over vatnet Bygdin og til Fondsbu.

Der brukar han å overnatte på DNT-hytta hos nettopp styrar Kvålshaugen.

– Difor er båtturen, Fondsbu og Solbjørg med i Donald-historia, seier han.

Kjelstrup har òg henta inspirasjon frå karakterar i Peer Gynt.

Peer Gynt si mor heiter mor Åse, medan ho i bladet får namnet mor Gåse. Vi møter òg karakteren Skravlegubben.

Sjølve bladet blir lansert laurdag på Fondsbu.

– Vi skal framføre historia som eit drama med Solbjørg i rolla som seg sjølv, seier forfattaren.

• Kva kan du om Donald Duck? Ta testen nedst i denne artikkelen!