Det er vanskeleg å slå fast allereie no om det blir kvit jul eller ikkje, men prognosane ser ikkje veldig lovande ut.
Publisert 21.10.2024 15:39 Sist oppdatert 9 minutter siden
Om berre to månadar er det jul igjen, og spørsmålet om det blir kvit jul er nok i ferd med å melde seg hos mange i tida framover.
Viss du er ein av dei som må ha snø for å få julestemning, så får du dessverre lite godt nytt i denne saka.
Vått og mildt
– Vi får ein høgtrykkssituasjon over den nordlege delen av kontinentet, og kanskje den sørlege delen av dei britiske øyer. På nordsida av høgtrykket vil atlanterhavslågtrykka styre inn mot Norge, seier vakthavande meteorolog Per Egil Haga ved Meteorologisk institutt.
Med andre ord blir det mild luft. Dette vil gjelde for store delar av landet, varslar Haga.
– No vil ikkje det vare heile tida, men den vêrtypen ser ut til å kome meir i sesongen vi har framfor oss enn det vi normalt har for den årstida. Det inneber at det mest sannsynleg blir ein våt og mild vêrtype, seier Haga.
Vakthavande langtidsmeteorolog Isak Slettebø i Storm har den same beskjeden. Samtidig understrekar han at ein må ta prognosane med ei klype salt.
– Prognosane bomma grovt i fjor for Norge og resten av Skandinavia, men dei trefte ganske bra for resten av Europa, for det blei ein kjempemild vinter i dei fleste land, seier Slettebø.
Kan bli våtare enn normalt
Om ein vil vite nøyaktig kva temperaturar og kor mykje nedbør vi kan vente oss, må ein difor vente ei stund enno. Men om ein skal tru på prognosane, så kan det altså tyde på at det blir mildt og vått.
– Vi ser eit mildvêrssignal som er ganske kraftig for heile Norden, seier Slettebø.
Ifølge sesongvarselet til Meteorologisk institutt er det størst sannsyn for at det blir meir nedbør og mildare vêr enn kva det har vore dei siste åra. Samtidig peiker Hagan igjen på usikkerheita ved ein slik prognose.
– Når det gjeld nedbør, er det veldig usikkert. Det kan like så godt bli vått som det blir tørt, seier Haga.