Chappell Roan til Noreg for fyrste gong

Den amerikanske artisten Chappell Roan kjem til Noreg for fyrste gong sommaren 2025.

Då skal ho avslutta den fyrste dagen av Øyafestivalen, skriv dei i ei pressemelding.

– Ho er blant artistane flest Øya-publikummarar har ønska seg til neste års festival. Dette vert den einaste konserten hennar i Noreg i 2025, skriv dei vidare.

Roan har på kort tid vorte ein av verdas største artistar.

Ho slo for alvor gjennom i år med låtar som «Hot to go» og «Good luck, babe». Båe låtane nærmar seg 1 milliard avspelingar på strøymetenesta Spotify.

Festivalen går av stabelen i Tøyenparken i Oslo 6.–9. august 2025.

Vann pris for beste nye artist

Roan er òg nominert til heile seks Grammy-prisar. Dei siste åra har ho mellom anna turnert med artisten Olivia Rodrigo.

Nyleg vann ho prisen som beste nye artist på MTV Video Music Awards. Blant dei andre nominerte var mellom anna Benson Boone og Gracie Abrams.

Artisten heiter eigentleg Kayleigh Rose Amstutz, men er utan tvil mest kjent under artistnamnet sitt.

Musikken hennar er mellom anna inspirert av synthpop frå 1980-talet og tidleg 2000-tals popmusikk.

Veks sakte

Allereie i tenåra vart ho signert til plateselskapet Atlantic, men dei droppa Roan før ho fekk gitt ut noko album.

Fyrst i 2023 kom debutalbumet «The Rise and Fall of a Midwest Princess».

I mellomtida hadde ho skapt ein heilt annan scenepersonlegdom. Frå å vera ein stille singer-songwriter vart ho meir outrert.

Til The Guardian har ho forklart korleis ho endra seg:

– Eg vaks opp med å tenka at homofili var ein synd. Eg gjekk på ein homoklubb ein gong og det var som magi. Det var det motsette av alt eg hadde lært, sa Roan til avisa i fjor.

Det var nettopp dette besøket på ein homoklubb som inspirerte artisten til å skriva ein av låtane ho no er mest kjend for: Pink Pony Club.