Brannvesenet sin garasje brann ned: – Måtte stå å sjå på

Politiet meldte natt til laurdag om at ein garasje med brannvesenet sine køyretøy og utstyr stod i full fyr i Leka i Trøndelag.

– Det er meldt om full overtenning av ein garasje som huser brannvesenet sine køyretøy, meldte Trøndelag politidistrikt klokka 4.15.

Garasjen brann heilt ned i løpet av natta.

– Måtte stå å sjå på

Roger Gjersvold ved 110-sentralen fortel at det lokale brannvesenet ikkje kunne bidra med sløkkinga.

– Alt utstyret deira var i garasjen. Brannmannskap frå brannstasjonar på landsida måtte komme med ferje for å gjere det som var igjen av sløkking og sikringsarbeid.

Han fortel det var lite igjen av garasjen da mannskap frå fastlandet kom fram.

– Litt dramatisk

Knut Lerseth bur like ved den nedbrente branngarasjen. Det var han som oppdaga brannen natt til laurdag og varsla politiet.

Han fortel at han og kona bur 100 meter unna garasjen. Sjølv om dei blei vekt av røyklukta opplevde dei ikkje brannen som veldig dramatisk.

– Det var litt dramatisk da gnistane byrja fly.

I tillegg fortel Lerseth at dei høyrde små eksplosjonar frå flammane.

– Men så veldig dramatisk var det ikkje. Det skal mykje til før vi blir vippa av pinnen, seier han.