Bhatti misnøgd med å forklare seg for lukka dører

Fredag vart fengslingsmøtet til Arfan Bhatti halde for lukka dører i Oslo tingrett. Påtalemakta ba om at han vart fengsla i fire nye veker.

Han er sikta for medverking til terror etter masseskytinga i Oslo 25. juni 2022.

Ifølge forsvararen hans var Bhatti førebudd på å forklara seg i retten.

Ho seier han reagerte kraftig på avgjerda om å lukka dørene, og dermed stenga offentlegheita ute.

– Han såg ikkje noko poeng i å forklara seg for retten når allmenta vert nekta innsyn i det han har å seia, seier forsvarar Inger Zadig frå Elden Advokatfirma.

Ifølge forsvararen meiner Bhatti at media vert nekta å utøva rolla si som vaktbikkje, og at han er kritisk til korleis norske styresmakter har handsama saka.

Oslo tingrett landa på å varetektsfengsla Bhatti i fire nye veker, med brev- og besøksforbod.

Han kan likevel få besøk av barna sine.

Forsvararen: Uforholdsmessig varetekt

Inger Zadig meiner det ikkje er nokon grunn til å halda Bhatti varetektsfengsla, og kallar det uforholdsmessig.

Årsaka er mellom anna det ho kallar «dei umenneskelege forholda» han opplevde då han sat fengsla i Pakistan.

– Dels tida som er gått, kombinert med eit svakt bevisbilete, seier Zadig.

Påtalemakta fryktar at Bhatti kan unndra seg vidare etterforsking eller øydelegga bevis viss han vert lauslaten.

Dei har bede om varetekt i fire nye veker med brev- og besøksforbod.

Forsvararen meiner det ikkje er noko risiko for at Bhatti vil unndra seg vidare etterforsking.

– Det er først og fremst fordi Bhatti meiner han er uskuldig og at han har ei god sak. Då vil det vera naturleg for han å møta i retten og argumentera for sin uskuld, framfor å tilbringa resten av livet på flukt.

Difor meiner Zadig òg at Bhatti vil stilla til ein rettssak sjølv om han vert lauslaten no.

– Sjølv om han tidlegare har flykta til Pakistan?

– Det er det ikkje hald for å hevde at han har. Han har vore på ein lenge planlagt ferie med borna sine. Det var godt kjent for norske styresmakter kor i Pakistan han var, svarar Zadig.

Bhatti vart utlevert til Noreg i mai 2024. Då hadde han vore i Pakistan sidan juni 2022, og det vart gjennomført fleire tital rettsmøte i landet før han vart utlevert.

Vonar å vera ferdige med etterforskinga i november

Av omsyn til etterforskinga vil ikkje politiadvokat Ingvild Myrold seia noko om kva skritt som står att.

– Det er eit stort puslespel kor me ser på alle brikkene i saka, seier ho.

Politiadvokaten seier òg at det er for tidleg å seia om det vert tatt ut ei tiltale. Ho trur likevel at politiet vil vera ferdige med etterforskinga før året er omme.

– Etterforskinga går aktivt føre seg og me har kome langt. Me meiner framleis at det er realistisk at ho vil ferdigstillast ved utgangen av november.

På grunn av dette meiner forsvarar Inger Zadig at det ikkje er noko fare for at Bhatti skal øydelegga bevis.

– Me meiner at det ikkje er nokre bevis å forspilla. Han har inga interesse i å forspilla bevis, seier ho.

Det var retten ueinig i, og viser mellom anna til at det er særleg stor fare for at bevis knytt til vitne i Pakistan skal verta øydelagde.

– Det er rettens vurdering at Bhatti har ein reell og konkret moglegheit til å forspilla bevis i saka, mellom anna ved å påverka vitne. Det er òg etter rettens syn sannsynsovervekt for at han vil nytta seg av denne moglegheita, heiter det i avgjerda.