12 skadde i eksplosjon på bar i Frankrike

Onsdag kveld gjekk det av ein eksplosjon inne på ein serveringsstad i Grenoble i Isère-regionen i Frankrike.

– Nokon kom og kasta ein granat. Tilsynelatande utan å seie eitt einaste ord, og så sprang dei bort, seier aktor François Touret-de-Courcy ifølge AFP.

I alt 12 personar blei skadde.

To av desse er kritisk skadde, ifølge aktoren. Myndigheitene i Isère-regionen har også sagt at seks personar er kritisk skadde.

Mistenker ikkje terror

Mange skal ha vore vitne til eksplosjonen.

Ingen er så langt pågripne. Motivet til gjerningspersonen er også uklart, men myndigheitene har utelukka at det dreier seg om terror.

– Det er ingenting som leiar oss til å tru at dette har tilknyting til terrorisme, seier Touret-de-Courcy.

Politiet undersøker nå om angrepet kan vere knytt til ulovleg narkotikaverksemd.

Gjerningspersonen skal også ha blitt sett med ei rifle av typen Kalasjnikov, som ikkje blei brukt i angrepet.

– Dette er ei ekstremt valdeleg handling, og kan ha vore eit oppgjer, seier aktoren.

Stor utrykking

Ordførar Eric Piolle fordømmer angrepet.

– Eg fordømmer på det sterkaste denne ufattelege kriminelle handlinga av ekstrem vald, skriv han på X.

Han takkar samtidig naudetatane for innsatsen, og seier at dei følger situasjonen tett.

Eksplosjonen skjedde like over klokka 20, i det som er kjent som den olympiske landsbyen frå da Frankrike arrangerte vinter-OL i 1968.

Grenoble ligg søraust i Frankrike, ved foten av alpane.

Baren som blei angrepet er ifølge viseordførar Chloe Pantel ein samlingsstad for lokale, spesielt i samband med fotballkampar.

Store mengder politifolk og brannmenn rykte ut til baren etter eksplosjonen.

Fleire av dei skadde blei frakta til universitetssjukehuset i Grenoble. Sjukehuset heva beredskapen etter meldingar om eksplosjonen.

Frankrikes helseminister Yannick Neuder skal besøke offer og helsepersonell på sjukehuset på torsdag.