Sykkelslagsmålet: NAF vil skilje syklistar og bilistar frå kvarandre

Torsdag publiserte NRK ein sak som viser at ein syklist blir angripen av ein bilist. Svært mange har reagert på videoen som syner ein bilist som angrip ein syklist på Mosseveien i Oslo.

Både sykkel- og bilorganisasjonane er einige om at noko må gjerast.

Tøffare klima

– Det er heldigvis sjeldan vi ser at det blir så alvorleg som dette, seier Jan Harry Svendsen, som er rådgjevar for trafikksikkerheit i NAF.

NAF har ikkje tal på at det er fleire uønskte hendingar, men dei er mykje på vegen ser ein hardare tone både i trafikken og i diskusjonsforum på nett.

– At det har blitt eit tøffare klima mellom syklistar og bilistar er det ingen tvil som, seier Svendsen.

Fleire syklistar

Både Oslo og fleire andre norske storbyar har lagt meir til rette for sykling dei siste åra. Oslo har totalt bygd eller oppgradert rundt 155 kilometer sykkelveg sidan 2015. Målet er at fleire skal gå og sykle framfor å køyre bil.

Satsinga har gitt resultat. Det er nesten 40 prosent fleire syklistar på kvardagar enn for ti år sidan. Samtidig har ulykkesrisikoen gått kraftig ned, syner ei evaluering EY har gjort for Oslo kommune.

Likevel trur NAF mange syklistar kjenner seg utrygge når dei syklar, spesielt der det er tett trafikk. Derfor bør syklistar og bilistar skiljast betre frå kvarandre, meiner NAF.

– Eit fysisk skilje hadde vore bra. Det hadde vore bra for bilistar også. Da hadde det blitt meir føreseieleg kor syklistane er, seier Jan Harry Svendsen i NAF.

Rød asfalt ikkje nok

Oslo har mål om at 25 prosent av arbeidsreisene skal vere på sykkel i løpet av 2025. Det må mykje sterkare tiltak til om det skal vere realistisk å nå målet, meiner Naf.

– Det held ikkje å berre legge litt raud asfalt nokon stader og tenkje at no er vi i ein sykkelby, seier halvt danske Jan Harry Svendsen.

Han anbefaler politikarane å dra til sykkellandet Danmark på studietur for å sjå korleis dei gjer det.

– Det må gjerast på ein måte som sikrar framkommelegheit for alle trafikantgrupper, anten dei er bilist, syklist eller fotgjengar, seier Svendsen.

Svakheit i sykkelfelta

Syklistforeningen er einig i at mange opplever sykkelfelta i norske byar som vanskelege.

– Sykkelstiane i mange av byane er stykkevis og delte, og sjeldan samanhengande, seier Eline Oftedal, generalsekretær i Syklistforeningen.

Det har ho sjølv opplevd:

– Eg opplever sjølv som syklist at det ofte er ein sykkelveg, og så plutseleg sluttar sykkelvegen og går over i vegbana.

Det meiner ho fører til farlege situasjonar.

Oftedal meiner at god tilrettelegging for syklistar reduserer konfliktar i trafikken.

Ho viser og til land med mange syklistar og ein tydeleg sykkelkultur, som Danmark, der alle ein tydeleg plass.

– Når sykkelfelt brått sluttar, må syklistar ta vanskelege val, noko som kan skape forvirring og konfliktar.

Syklistforeningen har spelte inn til byrådsplattforma at dei ønskjer at sykkelvegane skal henge saman.

– Der bilane veit kvar dei skal vere, og syklistane veit kvar dei skal vere, unngår ein konfliktar og får ein mykje betre kultur.

Ta meir omsyn

– Det store biletet viser at det er ein stor grad av respekt og omsyn mellom syklistar og bilistar, seier Eline Oftedal.

Jan Harry Svendsen i NAF trur det er mykje å gå på på det området.

– Bilistar og andre trafikantar og gi kvarandre rom og syte for at alle kjem trygt fram. Gjer alle det, og ikkje alltid står på retten sin, så trur eg vi alle kjem veldig mykje lenger som trafikantar, seier Svendsen i NAF.