Suel Kassembo tapte ankesaka - må truleg ut av landet

Suel Kassembo har budd på Sunnmøre i snart 20 år, og har kjempa i retten to gonger for å få opphald. I fjor haust tapte han i Oslo tingrett. No er det klart at han også taper i Borgarting lagmannsrett.

«Lagmannsretten ser ikke andre feil ved UNEs beslutning om ikke å omgjøre avslaget på søknaden om opphold begrunnet i sterke menneskelige hensyn», heiter det i dommen som blei avsagt tysdag ettermiddag.

Advokaten hans har tidlegare sagt at saka fort hamnar i Høgsterett, fordi den er så spesiell og prinsipielt viktig.

Sidan romjula i fjor har han vore i kyrkjeasyl i Herøy.

Fryktar for livet

Suel Kassembo har tidlegare uttalt at han er redd for livet, om han blir sendt tilbake.

I tingretten i fjor haust fortalde han om korleis foreldra blei drepne medan han gøymde seg.

– Det som har skjedd med mine foreldre, kan skje også med meg, så eg er veldig redd for å bli sendt tilbake, seier han.

Dømd til å betale

I dommen frå lagmannsretten er han også dømt til å betale sakskostnader. Det får han hjelp til.

Støttespelarane til Suel Kassembo har allereie samla inn rundt ein halv million kroner til rettssakene.