Staten Israel drev stor kampanje før finalen

Fleire har fått opp ein Youtube-reklame av årets deltakar frå Israel, Yuval Raphael, som ber dei stemme på henne.

I dagane før finalen kunne ein også sjå Raphael på storskjerm over Times Square.

Desse reklamane blei ifølge ei undersøking av Eurovision News Spotlight betalt av eit statleg eigd kampanje-byrå.

I år var budsjettet til den israelske TV-kanalen Keshet 12, som samarbeider med rikskringkastaren Kan, på rundt 11 milliardar norske kroner.

Staten tener på Eurovision-vinn

Eurovision-ekspert Anders Tangen meiner reklamekampanjen er eit bevis på at det er stor statleg interesse for eit land å vinne Eurovision.

– Dei gjorde det same i fjor, og med sånne kampanjar to år på rad ser ein at dei tenker dei har noko å vinne på det her, meiner Tangen.

Han seier det er interessant å sjå på motiva bak kvifor ein stat bruker masse pengar på ein kampanje for Eurovision.

– Det blir ein ubalanse i ressursbruk når staten viser interesse i dette.

Midtausten-ekspert Hilde Henriksen Waage seier det har vore viktig for Israel sidan andre verdskrigen å marknadsføre seg overfor vesten og Europa.

– Dei har alltid brukt Eurovision som ei plattform for politisk marknadsføring. Og etter 7. oktober har det blitt enda viktigare, seier Henriksen Waage.

NRK har spurt Staten Israels pressesenteret spørsmål rundt den statlege finansierte reklamekampanjen, men ikkje fått noko svar.

Prosjektleiar i MGP, Mads Tørklep, meiner det er vanskeleg å seie om kampanjen er eit brot på EBUs interne regelverk.

– Ettersom det ser ut som dette er reklame betalt av staten, kan det tolkast som eit politisk grep, men det er EBU som må svare på desse spørsmåla.

EBU svarer

Eurovision Song Contest-direktør Martin Green skriv i ein e-post til NRK at mange delegasjonar nyttar seg av betalte promoteringstiltak for å støtte songen, profilen til artisten og vidare karriere.

– Før finalen mobiliserte Israel ein statleg finansiert reklamekampanje der dei oppfordra folk til å stemme på bidraget sitt. Er dette imot EBUs retningslinjer?

– Reglane våre forbyr ikkje deltakande kringkastarar eller tredjepartar som plateselskap eller andre frå å promotere bidraga sine på nett og andre stader.

– Så lenge slik promotering ikkje bruker konkurransen som eit middel for andre formål eller bryt med dens redaksjonelle retningslinjer, svarer Green til NRK.

Folkets favoritt

Yuval Raphael vann klart publikumsstemmene under årets finale i Eurovision Song Contest, med 295 stemmer frå folket.

Men juryens vurdering gjorde at Israel likevel hamna på andreplass, bak Austerrike.

Ifølge Eurovision-reglane, kan sjåarane gi opptil 20 stemmer kvar, anten via SMS eller på nettsida til konkurransen.

Men fleire oppdaga at avgrensinga på 20 stemmer på nett var knytt til bankkort, ikkje person.

Dermed har fleire brukt ulike bankkort og på den måten stemt langt fleire enn 20 gongar på sin favoritt.

I kommentarfelta til mellom andre organisasjonen Med Israel for fred (Miff) oppmodar fleire til å gjere dette, og stemme fram Israel.

Den flamske kringkastaren VRT og den spanske kringkastaren La 1 krev ei gransking av folkeavstemminga i Eurovision-finalen etter Israel hamna på andreplass.

Israel fekk desidert flest folkestemmer totalt, tolv poeng frå folket i heile tolv land. Blant anna skjedde dette i Belgia, men juryen der gav null poeng, skriv blant anna NTB.

Det har ifølge Expressen, som siterer den belgiske nyheitsnettstaden HLT , ført til spørsmål om avstemminga var manipulert.

– VRT samarbeider godt med EBU på mange nivå, men utan eit seriøst svar på våre bekymringar om Eurovision, set vi spørsmålsteikn ved den framtidige deltakinga vår, heiter det i ei fråsegn frå kringkastaren VRT, som er den nederlandskspråklege allmennkringkastaren for radio og TV i Belgia.