Snart er kvinnene i fleirtal på legekontora

– Held dette fram vil vi i løpet av få år ha ei overvekt av kvinnelege fastlegar, seier leiar i Allmennlegeforeningen, Nils Kristian Kleiv.

Dei siste åra har 7 av 10 medisinstudentar vore kvinner. Fleire av dei vel også å bli fastlege.

No er det omtrent like mange kvinnelege og mannlege fastlegar i Noreg.

Kvinnelege fastlegar er meir populære

At det blir fleire kvinnelege legar på fastlegekontora rundt om i landet, er godt nytt for dei som er opptatt av kva kjønn legen har.

For berre tre år sidan hadde kvinnelege fastlegar over 60 prosent fleire pasientar på ventelistene, enn sine mannlege kollegaer.

No viser nye tal frå Helsedirektoratet at det er i ferd med å snu.

I april 2025 har kvinnelege fastlegar i median 40 pasientar på venteliste, og mannlege 46 pasientar.

– Eg har eit inntrykk av at mange kvinner er meir opptatt av å ha fastlege med same kjønn, enn det menn er, seier fastlege ved Førde legesenter, Tonje Siren Bjørset.

Kvir seg til legebesøket

Bjørset trur det heng saman med at kvinner oppsøker fastlegen oftare, i forbindelse med anbefalte rutineundersøkingar, som celleprøve for livmorhalskreft.

– Det er mange som kvir seg generelt for gynekologisk undersøking. Eg opplever ein del kvinner som seier det er lettare å gjere det med ein kvinneleg lege.

På legesenteret i Førde gjer dei fleire tiltak for å trygge kvinner som kjem inn for slike undersøkingar.

Pasientane kan be om å få ha kvinneleg helsepersonell i rommet, om det er ønskeleg.

Dei arrangerer også årleg ein celleprøvekveld, i forbindelse med sjekkdeg-kampanjen.

– Då er det alltid tilbod om å få kvinneleg lege, og det er ein del kvinner som nemner at det er enklare å få gjort undersøkinga når dei har ein kvinneleg lege.

Våg å prate med fastlegen din

Sjølv om Noreg er i ferd med å få ein kjønnsbalanse i fastlegeordninga, er det framleis for få legar.

I år er det rundt 136 000 innbyggjarar som ikkje har fastlege.

Kan ein då krevje at legen din skal vere mann eller kvinne?

– Det bør vere eit mål om at ein har nok fastlegar til at folk har eit reelt val når det kjem til fastlege, slik at ein kan finne ein som ein trivst med, anten det går på kjønn, stil eller personlegdom.

Siri Dalsmo Berge er allmennlege, og seniorforskar ved allmennmedisinsk forskingssenter på Norce i Bergen. Ho trur mange pasientar synest det er lettare å opne seg for folk dei føler er meir lik dei sjølve.

– Mange kvinner synest nok det kan vere vanskeleg å kle av seg framfor ein mannleg lege. Det er viktig å sei at både kvinnelege og mannlege legar har ei profesjonell tilnærming til slike legebesøk.

Ho fortel at det dei siste tiåra har vore eit større fokus på kommunikasjon med pasientar, i spesialistutdanninga for allmennmedisin.

Johannes Hustveit valde å spesialisere seg på kvinneklinikken i Førde, då han skulle bli fastlege. Han håpar det kan gi pasientane hans ei ekstra tryggleik, og bryte nokre av dei vanskelege barrierane.

– Eg prøver å gjere jobben min så godt eg kan, og ved å gi god informasjon, så opplever dei fleste at vi kan gi veldig gode tilbod, vi òg.