Skreiv at kvinne skulle bli «tatt ut» – skal nesten ha blitt drepen, ifølge aktor

I starten på den femte veka av rettssaka mot dei to IS-tiltalte søstrene, la politioverbetjent Martin Bøyum fram elektroniske beslag frå mobiltelefonen til den eldste søstera.

Då ho brukte denne mobiltelefonen, var ho i den overfylte Al Hol-leiren i Syria saman med borna sine. Denne leiren var prega av vald og stor naud.

På mobilen hadde den eldste søstera frå Bærum lasta ned IS-propaganda og ein avretting-video.

Ho meiner ho måtte ha dette på telefonen, for å framstå som ein tilhengar av IS. Om ikkje, ville dette sette ho i fare.

Mobilen har norsk politi fått frå britisk politi. Britane tok telefonen då dei arresterte den eldste søstera i Al Hol-leiren. Det var fordi ho hadde omsorga til barnet til ein kjend framandkrigar.

Denne kvinnelege framandkrigaren frå Storbritannia skal ha ønska å vere den første til å halshogge personar frå vesten, ifølge fleire medium.

– Ein ting er hennar radikale meiningar, men ho var ein hyggeleg person, svarar søstera i retten.

Den eldste av dei to søstrene er tiltalt for å ha «handtert hendingar og reaksjonar» mot kvinner som blei sett på som fiendar av IS, eller som ikkje støtta IS sin ideologi i leiren.

På denne telefonen fann politiet fleire samtalar som dei meiner beviser dette.

Dei to søstrene nektar straffskuld i saka. Ifølge dei sjølve reiste dei til Syria for å drive hjelpearbeid, og at dei aldri støtta IS.

– Banke driten ut av dei

I mars 2021 chatta den tiltalte med ei kvinne ho trur var finsk-somalisk. Temaet i samtalen var kva ein skulle gjere med fem kvinner i leiren som blei sett på som «spionar».

Denne flyktningleiren var driven av ein kurdisk milits. Dei som budde der, kom frå tidlegare IS-kontrollerte område.

Til retten fortalde ho om eit tøft miljø der dei måtte følge IS sine spelereglar, samstundes var det et «lovlaust samfunn».

Søstera forklarte kva den russiske-talande gruppa ville gjere med «spionane» fordi dei hadde forårsaka så mykje skade i leiren.

– Dei skulle banke driten ut av dei, fortel søstera i retten.

Påtalemakta meiner derimot at tiltalte sjølv var involvert i handteringa av «spionane».

I chatten fortel søstera om planane:

«Vi gjer ingenting akkurat no. Vi ventar berre på løyve til å gjere jobben», skreiv den eldste søstera.

Det var ein dommar i IS som skulle gje dette løyve.

I retten blei den tiltalte pressa på kven ho meinte vi var. Søstera innrømte at vi var ho sjølv og den russiske-talande gruppa med kvinner, men ho avviste at ho skulle vere med på dette.

– Om dette er nokon andre enn deg, kvifor skriv du ikkje «they»?

– Eg skriv det seinare. Ein bruker «we» og «they» om kvarandre.

– Det forstår eg ikkje, men ok, svarar aktor.

– Kvifor involverer du deg da, legg ho til.

– Eg budde i deira nabolag. Når du er så tett på det så er du ein del av vi-et, sjølv om du ikkje har ein intensjon om å gjere noko.

Deretter blei ho spurt av aktor om kva «jobb» som skulle bli utført.

– Det var å utøve fysisk vald mot desse kvinnene.

I chatten skreiv den eldste søstera vidare at ho hadde brukt dei siste dagane til å følge med på «spionane».

Søstera forklarte at desse kvinnene var farlege fordi de fortalde vaktene om kven som hadde telefonar, planla å rømme og liknande. Sikkerheitsvaktene kunne då stele og banke opp kvinner, forklarte søstera.

– Ikkje så alvorleg som språket ser ut

I chatten frå mars 2021 skreiv den tiltalte at «søstrene» ville at alle dei fem kvinnene skulle bli «taken out». I retten forklarte den tiltalte at med «søstrene» refererte ho til gruppa med russisk-talande kvinner i leiren.

«Fem spionar er involverte og søstrene vil «ta ut» alle saman», skreiv den tiltalte.

– Språket er veldig veldig tøft. Det var ikkje så alvorleg som språket ser ut. Intensjonen var å stoppe desse kvinnene frå faren og trusselen dei var mot samfunnet i Al Hol, sa den tiltalte.

Ifølge aktor meiner PST at dei har identifisert ei av den fem «spion-kvinnene».

– Er du kjent med om ho blei utsett for vald, spør Formo.

– Eg er ikkje kjent med det. Ingenting skjedde med desse kvinnene medan eg var i Al Hol-leiren.

– Det har kome fram opplysningar om at ho nesten blei drepen. Har du kjennskap til det?

– Nei, svarar den eldste søstera.

Den tiltalte forklarte at ho følgde med på desse «spionane» fordi dei kunne sette henne i ein farleg situasjon.

– Det var viktig å vite kven ho skulle unngå, sa forsvarer Tor Omar Nyquist til NRK då retten var heva.

Statsadvokat Marit Formo seier påtalemakta ikkje kjøper denne forklaringa.

– Vi meiner ho hadde ei rolle i det som skjedde der, og at forklaringa hennar ikkje fremstår som truverdig, seier Formo til NRK.

Les meir om kva dei er tiltalt for her: