Rottetrøbbel på Stortinget: Fekk følgje av rotte i slusa

2 hours ago 2

Rotteproblemet rundt Stortinget har eskalert og blitt en snakkis blant politikerne.
Politikere som Maren Grøthe og Bengt Fasteraune deler personlige opplevelser med gnagerne.
Stortinget har intensivert overvåkning og patruljering for å håndtere problemet.

Ein treng ikkje vere David Attenborough for å få auge på rottene rundt Stortinget. Berre på ein vanleg torsdag føremiddag to dagar for Stortinget si høgtidelege opning - aula det av store- og noko mindre rotter - bak kiosken i Spikersuppa.

– Det er ikkje veldig hyggjeleg når du skal på jobb, og det spring rotter rundt føtene dine, seier Maren Grøthe (Sp) til VG.

Ho er ein av mange nye stortingsrepresentantar. Grøthe kan med sjølvsyn konstatere levande rotter både framom Eidsvoll plass ved Stortinget og lenger oppover mot Slottet.

Grøthe (24) takka ja til ein liten rotterunde med VG.

Ho fortel at rotte-populasjonen ved nasjonalforsamlinga har blitt ein snakkis på Stortinget.

Då Sp si partigruppe hadde morgonmøte torsdag denne veka, kom Grøthe si partifelle Bengt Fasteraune (61) med ei rottehistorie som ga sjølv robuste Sp-folkevalde bakoversveis.

Då VG bad om det, kom Fasteraune utan ugrunna opphald rett ut frå kontoret sitt for å rekonstruere rotte-opplevinga si frå tidlegare i haust.

Rotta i slusa

– Eg var slik halvsløv på morgonen. Akkurat då eg hadde kome inn i slusa ved inngangen til Stortinget, så såg eg at det var ei rotte der. Då tenkte eg: F..., kva gjer du no, liksom?

– Då gjekk eg inn på Stortinget. Men så tenkte eg at eg kan jo ikkje late den rotta stå att i slusa. Så gjekk eg inn i slusa igjen - og då døra opna seg så fekk eg vippa den ut med skotuppen. Då havna den nede i trappa og ut på gata her, fortel den robuste stortingsrepresentanten frå Dovre medan han demonstrerar og gestikulerar med både armar og føter.

Like ved inngangen på baksida av Stortinget i Akersgata - er det sett ut to store rottefeller.

Patruljering

Det er iverksett dagleg patruljering ved alle inngangspartia samt på Eidsvolls plass og Wessels plass for å overvake rottene, får VG vite av gruppeleiar Bjørn Erik Rustad i seksjon for eigedomsdrift i Stortinget sin administrasjon.

Stortinget sine tiltak

Stortinget har etablert eit førebyggande system for skadedyrkontroll:

Dagleg tilsyn av Eidsvoll plass og Wessels plass samt ved inngangspartia.
Ofte tømming av søppelbøtter minimerer lukt og tilgjengeleg mat for rotter.
Kort responstid ved tilgrising, daglege inspeksjonsrundar.
Vi har ein fast avtale med profesjonelt skadedyrfirma med førebyggande tiltak.
Det er utplassert feller og åtestasjonar både innandørs og utendørs, som blir inspisert jamnleg.
Bygningane blir haldne tette.

Desse tiltaka har bidrege til at det enno ikkje er registrert problem med rotter inne i bygningsmassen.

(Kjelde: Gruppeleiar Bjørn Erik Rustad i seksjon for eigedomsdrift i Stortinget sin administrasjon.)

Maren Grøthe debuterer med fast stortingsplass. Ho meiner det står respekt av Fasteraune si handlekraft då han fekk stogga inntrengaren.

Både ho og den meir røynde Sp-representanten tykkjer rotter er ekle dyr.

– Det er jo slik at ein nesten let att augene då ein går på jobb. Her er jo rotter over ein låg sko . Er nok diverre mange i Oslo som kjenner seg att i dette, seier Grøthe.

Brått får ho auge på ei rotte. Ho tvingar seg nærmast til å feste blikket på den. Lynraskt forsvinn den ned i eit rottehol.

– Er du redd for rotter?

– Det finst vel ikkje nokon som er glad i rotter som dette. Er det? Men at eg er redd for rotter, det er det å ta i, svarar Grøthe.

Ho kjem frå eit småbruk i skistjerna Oddvar Brå si heimbygd, Hølonda i Trøndelag.

Bør vurdere nullvisjon

Der har dei ein katt som tek mus. Men både Grøthe og andre trur det nokon vil kalle monsterrottene er for store for ein middels vaksen katt.

Rottene ved Stortinget og langs Oslo si paradegate Karl Johan opp mot Slottet er uansett blitt eit stort problem som vi bør kunne ta tak i, meiner Grøthe.

Ho vil helst ikkje sjå overskrifter som «RotteSlottet» i korkje denne avisa eller andre tabloide publikasjonar.

– Kva tiltak bør Stortinget setje inn?

– Eg veit ikkje om det er Stortinget eller byrådet eller kven som skal setje inn tiltaka. Men på rovdyr så har me jo bestandsmål. Eg meinar at me burde kunne ha ein nullvisjon for rotter i Oslo sentrum, seier politikaren frå eit parti som sjølv nesten har null (0,8 prosent) i oppslutnad i hovedstaden.

Behov for tiltak mot rottene i Oslo sentrum?

aJa, skadedyra må utryddast mest mogeleg.bNei, rottene er komne for å bli.cDet er behov for tiltak, men så lenge folk slenger søppel rundt seg, så forsvinn ikkje rottene.

– Voldsomme saker

– Kva synest du om storleiken på rottene her?

– Det er tydeleg at dei får i seg mat. Det er voldsomme saker. Nei, me bør få til eit større uttak av rotter her, seier Grøthe på attkjenneleg Senterparti-språk.

Ho minner om at det snart blir rigga til julemarknad langs Karl Johan. Ikkje så hyggeleg med rotteselskap der, åtvarar ho.

– Kva med ein eller fleire stortingskattar?

– Eg er redd rottene er for store. Men eg vil ikkje utelukke det, seier Maren Grøthe til VG.

Stortinget sin administrasjon opplyser til VG at det ikkje har vore observasjonar eller fangst av rotter inne i Stortinget sin bygningsmasse på mange år.

Men dei føl dette nøye opp - sjølv om observasjonar utanfor bygningane blir sett på som eit generelt bymiljøproblem, ifølgje Bjørn Erik Rustad i Stortinget sin administrasjon.