Bådåddjo sihtá sáme háldadimguovlluj
Bådåddjo suohkan ájggu åhtsåt bessat oassen sáme giellaháldadimguovlos. Dat boahtá åvddån præssadiedádusán.
Ássje galggá giehtadaláduvvat stádastivra tjåhkanimen biehtsemánon. Jus åhtsåmus dåhkkiduvvá, de sjaddá Bådåddjo giellaarvusmahttemsuohkan.
Tjavtjan åvdep jage mannin háldadusoajvve Kjell Hugvik aktan suohkanåjvijn Odd Emil Ingebrigtsen Sámediggáj guládalátjit prosessa birra.
– Muv mielas la ållu luondulasj Bådåddjo oadtju dákkár stáhtusav. Miján la guhkes sáme histåvrrå, ja lip dájt maŋemus jagijt systematihkalattjat barggam váj galggap buorre fálaldagájt vaddet mij guosská sámegielaj bisodibmáj mijá guovlon, javllá Ingebrigtsen.
2015 jage rájes la Bådådjon læhkám aktisasjbarggosjiehtadus Sámedikkijn. Suohkanin la juo julevsámegiela mánájgárddefálaldahka ja vuodoåhpadusfálaldahka. Duodden dåjmadi Stoarmmo sáme guovdátjav.
Giellaarvusmahttemsuohkanin sjaddi oadtjot sierralágásj åvdåsvásstádusáv sáme giella- ja kultuvrrafálaldagáv sihkarasstet álmmugij.
English (US)