Raudt farevarsel: – Faren for grasbrann er stor

– Vi vil gjerne at folk skal kose seg på tur, men dei må vere forsiktige. Det er den heilt klare oppfordringa vår.

Det seier Daniel Solli, branninspektør og informasjonsrådgjevar i Follo brannvesen.

Ifølge Meteorologisk institutt si oversikt vil det frå torsdag 3. april komme raudt farevarsel for gras- og lyngbrann fleire plassar på Sør- og Austlandet.

Brannvesenet ber folk om å vere aktsame når dei brukar eld og bål ute i naturen.

– Nå er risikoen ganske stor for at det kan ta fyr i tørt gras og gammal vegetasjon frå i fjor. I verste fall kan det starte ein større brann, seier Solli.

– Det kan også spreie seg til bustadar, og få store konsekvensar.

Vil vare lenge

Vakthavande meteorolog ved Meteorologisk institutt, Anne Solveig Andersen, fortel at det kan vere aktuelt å utvide farevarsla dei kommande dagane.

– Akkurat nå er det gult farevarsel for skogbrann på store delar av Sør- og Austlandet. Vi følger med på Vestlandet, for det har vore ganske tørt der òg.

Ifølge Andersen vil farevarsla gjelde fram til det kjem ei større nedbørsmengde.

– Slik det ser ut nå, vil det ta rimeleg lang tid. Dette farevarselet vil nok gjelde i lang tid framover.

Mild vinter gir tørr vår

Meteorolog Andersen trekker fram ein mild vinter som årsaka til det tidlege varselet.

– Skogbrannfaren gjeld dei plassane utan snø. Jo mindre snø, jo fleire plassar med skogbrannvarsel.

Ho beskriv tida vi er inne i som ein «mellomperiode».

– Våren er litt skummel, for det har enda ikkje blitt grønt. Det gjer at tørt og dødt gras frå i fjor ligg og tørkar i sola. Det er lett-tenneleg.

Ho kjem også med tydelege oppfordringar.

– Det er fint vêr, og sikkert mange som vi kose seg ute. Ver klar over at det er tørt rundt omkring. Ikkje bruk open eld der du ser det er tørt, seier ho.

Andersen legg til at vêret i nord derimot, ikkje er like fint.
– Nord får lågtrykk og nedbør dei kommande dagane, mens sør har moderate UV-strålar og skogbrannfare, så det er ulike utfordringar.

Bålforbod

Frå og med tysdag 15. april trer bålforbodet i kraft.

Branninspektør Daniel Solli, påpeikar at det likevel er ei generell plikt at alle må vere aktsame når dei tenner opp eld, brenn hageavfall eller grillar på eingongsgrillen i finvêret.

– Kjem det ein stor brann i vegetasjonen, kan det bli krevjande for oss å sløkke. Vi har beredskap om noko skulle skje, seier Solli.

NRK har vore ute og sjekka kor tørt graset er onsdag ettermiddag. Resultatet var: Veldig tørt.