«Overtenning i Spektrum»

Kjartan Lauritzen har førebudd seg på denne kvelden lenge no. Han har posta om konserten utan stans i sosiale medium, med lovnader om ein ekte Balestrand-fest midt i Oslo sentrum.

For Per Áki Sigurdsson Kvikne, som han eigentleg heiter, skal straks bli far og begynne å prioritere annleis i livet.

Om det betyr slutten på Kjartan Lauritzen, vil tida vise – men med denne konserten vil han i alle fall toppe ut karrieren så høgt han kan.

Heimbygda på plass

Heile bygda er med på laget for å halde løftet.

Faren sitt band er oppvarmingsartist og speler ein god halvtime med James Taylor- og Carole King-songar.

Eit kvarter unna Oslo Spektrum, på restauranten Mike’s Corner, har sogningar vore samla til vors før showet. Og blant seteradene kryr det av sambygdingar.

«Neimen, e heile Balestrand her?» spør ein som ser ein kjenning. «I alle fall halve.» svarer ho.

Til referanse, det er plass til fjorten gonger Balestrand inne i Oslo Spektrum.

«Kjartanistane» sin kveld

Det er ikkje eit kva som helst show folka hans har reist for å sjå. Kjartan Lauritzen har aldri gjort ein så stor solokonsert før.

Og sjølv om hits som «Fredag», «Havanna» og «Shakira» er sjølvskrivne innslag, har Lauritzen både låtar frå sist sesong av «Kvar gong vi møtast» og ein lang gjesteliste å velje frå.

Han startar med eit sjokk når han stig opp frå scenegolvet i ein pyroeksplosjon. Etter «Tada» er «Havanna» andre song, slik at han kan vere heilt sikker på at han har heile publikum på gli frå start.

Dei to låtane set ein viktig standard for showet. «Kjartanistane» skal få si hyllest, men alle i salen skal få ein storslått fest.

Vokalen til Lauritzen er sterk og ber godt, trommene kjennest i brystet, og den energiske, keitete dansen sjarmerer publikum til å danse med.

Men allereie her reiser spørsmålet seg. Kan dette energinivået, i både rapping og dans, halde i to timar?

Kontroll på stemninga

For ein artist som tilsynelatande tek det meste i livet slik det fell seg, er denne konserten ukarakteristisk taktisk lagt opp.

Akkurat når det begynner å bli litt intenst med partylåt etter partylåt, drar dei det ned med Balestrand Badeklubb si ballade «Igjen».

At den dediserast til avdøde Dutty Dior, gir eit ekstra skifte i stemninga.

Så kjem eit par standard Kjartan Lauritzen-låtar, «Alt e vil» og «Game Boy» frå 2019. Linni kjem på og gjer Neste planet-songen «Mana», før ein får riste laus til «Shakira».

Både artistane og publikum kosar seg stort, men det er eit hakk til av energinivået som begge veit å spare.

Når det så igjen er tid for eit avbrot, blir me introdusert for bandet Kjartallica. Med blant andre Edvard Smith Save frå Brenn. oppfyller dei det Lauritzen fortel om som ein barndomsdraum: å spele rockegitar for heile Spektrum.

Så dei gjer Metallica sin «Seek and Destroy». Alle sju minuttane av han.

Kjartan Lauritzen sjølv ser ut som han speler «Guitar Hero», men med to andre gitarar på scena smeltar det saman til noko bra.

Opp, opp og av garde

Herifrå tek festen seg berre opp, og faktene held fram.

Det blir felles bursdagssong for «Jostein og alle andre som har bursdag». Dei køyrer ein Volvo 240 inn på scena. Det blir fleire kleine takketalar.

Men først og fremst dans, allsong og hopping.

Måten showet held publikum i gong gjennom å variere akkurat nok og møte dei på energinivå, minner nesten om korleis Gorillaz spelar på sinnstilstandar under sine lange show.

Men hos Kjartan er ironisk distanse bytta ut med rein tøysete, uhøgtideleg og varm humor.

Grine på klubben

Frå sekundet tre Ylvis-brør kjem på for gimmick-låta «Skaol skadle» skrur publikum opp til maks, og det er ingen veg tilbake. Sitteplassane blir ståplassar, og ståplassane blir eit fullverdig dansegolv.

Og sjølv om partyfaktoren er skyhøg til siste slutt, er det ikkje den som gjer konserten komplett.

Når publikum syng med til «Bygdegut» og «Fanga av ein stormvind» frå «Kvar gong vi møtes», to absurd vakre og rørande augeblikk, det er då det blir klart at han når toppen han siktar etter.

«Fredag» avsluttar sjølvsagt, heilt obligatorisk, konserten etter to timar. På ein fredag attpåtil.

Då har alle som kom, om dei er åtte eller åtti, om dei har reist langt eller ei, fått alt dei kom for og meir.