Oppdaga relasjonen i byrådet på fest på ordføraren sitt kontor

Laurdag 27. september var den politisk leiinga i Trondheim samla til ei «uformell samling».

– Der fekk eg ei følelse av at relasjonen mellom byrådsleiar Kristian Dahlberg Hauge og byråd for sosiale tenester Christianne Bauck-Larsen gjekk ut over det profesjonelle.

Det skriv ordførar Kent Ranum i ein e-post til NRK.

– Den sosiale samlinga var uformell, og var på mitt kontor, bekreftar ordføraren.

Adresseavisen har også omtala festen på ordføraren sitt kontor.

Forklarte avgangen med «personlege årsaker»

Måndag denne veka varsla byrådsleiar Christian Dahlberg Hauge at han går av på ein pressekonferanse.

Dette grunngav Hauge i personlege årsaker og høgt arbeidspress over tid.

Men allereie tysdag blei det klart at den eigentlege årsaka til avgangen var at det hadde oppstått ein relasjon mellom han og byråd for sosiale tenester, Christianne Bauck-Larsen.

Då opplyste ordførar Kent Ranum at han blei informert om relasjonen 1. oktober.

– Eg mottok beskjed frå Kristian den 1. oktober om at han og byråd Christianne Bauck-Larsen hadde innleia ein relasjon.

Det skreiv ordførar Kent Ranum i ei tekstmelding til NRK.

Onsdag bekreftar ordføraren at han allereie visste om relasjonen, frå festen på Rådhuset.

– Kva tenker ordføraren om strategien om å ikkje gje all informasjonen med ein gong?

– I ettertid kan det hende at vurderinga vår av kommunikasjonen i saka har vore feil. Samtidig vil eg understreke at det er betydelege menneskelege og praktiske omsyn som skal ivaretakast i denne typen saker, svarar ordføraren.

– Ein skal vere sikker før ein konkluderer, og det skal sørgast for at styringa av byen blir ivaretatt. Disse to omsyna har stått sentralt i vår handtering av saka.

– Mistanken min var riktig

Etter festen på kontoret sitt bad Ranum om at rådgjevar ved ordføraren sitt kontor og gruppeleiar for Høgre om å ettergå relasjonen i byrådet.

– For å avdekke om det har førekome åtferd eller relasjonar som er eigna til å svekke tilliten til byrådet generelt eller byrådsleiaren spesielt, utdjupar Ranum.

– Dei interne undersøkingane viste etter kort tid at mistanken min var riktig og at det hadde utvikla seg ein relasjon mellom byrådsleiar og byråden, legg han til.

Ranum seier at han umiddelbart kalla Hauge inn til ein samtale då han fekk denne informasjonen.

– Dette skjedde onsdag 1. oktober. Kristian Dahlberg Hauge og eg blei einige om at det riktige var at han skulle fråtre si rolle som byrådsleiar.