Nye beslag heime hos Arne Bye: – Det er veldig opprivande

– Du blir på ein måte tatt tilbake i tid, seier ei av kvinnene Arne Bye filma under gynekologiske undersøkingar og som Bye har erkjent å ha valdtatt.

Tysdag gjekk politiet igjen til aksjon mot huset til den tidlegare kommuneoverlegen i Frosta.

Både tysdag og onsdag leitte eit titals politietterforskarar systematisk gjennom heimen.

Brannvesenet blei tilkalla for å hjelpe til å leite i pipa og etterforskarane leitte i takrenna, under terrassen og snudde steinhellene i hagen.

Posar og plastkassar med beslag blei bore ut av huset.

– Det er veldig opprivande, fortel kvinna.

Ho seier ho no tenker på at det kan finnast meir videomateriale av henne enn ho har trudd.

– Det er den usikkerheita og den utryggleiken ... Det er den som er trasig.

Tre år sidan saka sprakk

Ransakinga skjer ti månader etter at politiet avslutta etterforskinga av saka og nesten to og eit halvt år etter etterforskinga starta i august 2022.

Dette er fjerde gong politiet ransakar heimen til Bye.

– Du får jo følelsen av at det har blitt gjort slett etterforsking, seier kvinna.

Ho seier det er merkeleg at politiet ikkje har ransaka heimen til Bye like grundig før rettssaka starta.

– Det er jo veldig merkeleg at dei ikkje har gjort så grundige ransakingar før rettssaka starta.

Da politiet ransaka heimen til Bye før rettssaka starta tok dei beslag i 5500 timar med videomateriale.

– Og det at det plutseleg dukkar opp ein leilegheit til som han visstnok har hatt tilgang til og som også blir ransaka.

Onsdag ransaka politiet ein leilegheit som tidlegare har tilhøyrd Bye. Der bar politiet mellom anna ein stasjonær PC ut frå leilegheita.

– Igjen blir ein sittande med mange nye spørsmål, fortel kvinna.

– Skaper uro

– Dei får nok ein følelse av at det aldri tar slutt, seier Ingunn Kjelstad.

Ho er bistandsadvokat for fleire av dei 94 kvinnene som var fornærma i rettssaka mot Bye og for åtte av dei 21 kvinnene som i ettertid har meldt Bye til politiet.

Kjelstad fortel at fleire av kvinnene har tatt kontakt etter at politiet denne veka ransaka bustaden til Bye.

– Det skaper mykje uro.

– Ein begynner å bli redd for at det er materiale som framleis ikkje er i politiet sin besittelse.

Kan truleg aldri vere sikker

Påtaleansvarleg for saka, politiadvokat Ole Andreas Aftret, seier politiet ikkje kan seie med sikkerheit at dei har kontroll på alt videomaterialet.

– Sjølv om det er eit mål for etterforskinga å kome dit at vi får gjort greie for alt, så vil vi truleg aldri få eit sikkert svar på det, seier Aftret.

Berre Bye sjølv veit kor mykje som har blitt filma og kor videomaterialet ligg, seier Aftret.

– Politiet har den siste månaden gjort beslag av ein stor mengde «databerarar» og den vidare gjennomgangen av disse vil vise om vi kan tette nokre hol og få gjort greie for ein komplett tidslinje.

Også i februar ransaka politiet Bye sin bustad. Både da og denne veka er det tatt beslag i digitale lagringseiningar, fortel Aftret.

Onsdag fortalde Aftret at dei har tatt beslag i gjenstandar som dei ser på som bevis i saka.

– Kvifor disse einingane ikkje har blitt funne tidlegare er det vanskeleg å svare på. Har politiet oversett dei, er dei flytta på eller er dei blitt anskaffa etter ransakinga?

– Også dette er spørsmål sikta i saka står nærmast til å svare på, men som politiet vil forsøke å finne svar på gjennom sine undersøkingar.

– Burde de ha ransaka huset så grundig som no da de først etterforska saka?

– Eg har eigentleg ikkje så mange tankar om det. Det eg har hatt tankar om er at vi skal gjere det no.

Politiet har enno ikkje gått gjennom materialet som blei funne.

Bye sin forsvarar, Erlend Hjulstad Nilsen, fortel at han har vore i kontakt med Bye. Utover det ønsker ikkje forsvararen å gi nokon kommentar.

Venta dom i juni

Bye sjølv sit varetektsfengsla. Han blei pågripen like etter at saka mot han blei avslutta i Trøndelag tingrett.

Rettssaka gjekk i tingretten mellom 5. november og 19. februar.

Bye erkjente i løpet av saka å ha valdtatt 21 av sine tidlegare pasientar. Han har også erkjent å ha misbruk stillinga si for å oppnå seksuell omgang med 44 av dei.

Det er venta at dom i saka kjem i starten av juni.