Ny Unge Venstre-leiar: – Nokon bygder må ein la døy

Unge Venstre har fått ny leiar.

Omar Svendsen-Yagci (V) startar leiarvervet med eit tydeleg syn på dei små bygdene.

– Uavhengig av kor mykje pengar vi brukar på å halde kvar bygd og grend i live, kan vi sjå at folk flyttar vekk der ifrå, seier Svendsen-Yagci.

I skulestruktur-saka, der Innlandet fylkeskommune vedtok å legge ned to vidaregåande skular og fire skulestader, seier Svendsen-Yagci at fylkestinget gjorde ei klok avgjerd.

– Det er ingen enkel debatt, eg forstår at folk vil ha skulen sin. Dei har vore modig i avgjerda. Det var eit riktig val, sjølv om eg ikkje er einige med dei om mykje anna, seier Svendsen-Yagci.

Sterkare regionar, ikkje bygder

Den nye ungdomspartileiaren seier at politikarane ikkje tørr å tenke nytt om bygdene, inkludert fylkespolitikarane frå hans eiget moderparti.

• Lengre ned i saka kan du lese om at Unge Venstre ville behalde Skarnes vidaregåande skule, da dei sa si meining i gruppemøtet til Venstre.

Han trur at ein må «slutte å jage etter fortida» når ein snakkar om løysningar for bygdene. Sterkare regionar med urbane trekk trur han trekk folk tilbake, medan bygdene ikkje er politikaranes ansvar.

– Nokon bygder og grender må ein la døy. Det er ikkje eit politisk ansvar å halde dei i live.

– Er ikkje det litt fiendtleg mot mange i Innlandet?

– Eg meiner ikkje at bygdene skal døy. Men vi kan ikkje bruke den feilslegne politikken vi har brukt i dag, der vi kastar pengar og politiske ressursar på dei, utan at det hjelper og når dei måla vi ønsker, seier Unge Venstre-leiaren.

– Feil medisin

Nestleiar i Senterungdommen, Erik Lillebakken, seier at Unge Venstre visar sitt sanne ansikt og kva som er i vente, om det blir ei ny regjering neste år.

– Da blir det ei massiv sentralisering av tenester, særleg i distrikta, og ein massiv bygdedød, spår Lillebakken.

Lillebakken ser liten forskjell på regionalisering og sentralisering. Han trur desentralisering er løysinga for å få sterkare bygdesamfunn og at ein indirekte får sterkare regionar.

Han meiner difor at nedlegging av vidaregåande skular verker mot si hensikt.

– Ved å legge ned skular, hiv du meir bensin på det sentraliseringsbålet. Eg meiner det er heilt feil medisin i møte med dei utfordringane vi ser, seier Lillebakken.

Lurar du på korleis skulane som leggast ned stemte førre val?

Ville behalde skule i gruppemøte

Venstre si fylkestingsgruppe i Innlandet stemte mot skulenedlegging.

Stig Vaagan (V) seier at kunnskapsgrunnlaget ikkje var godt nok for å gjere vedtaket om å legge ned skular. Venstre blei heller ikkje spurt om å vere med på eit kompromiss med Høgre, Ap og MDG.

– Det er for mange spørsmål vi ikkje får svar på i utgreiinga. I ei så alvorleg og viktig sak, så er vi for så vidt villig til å gjere grep. Men da må det vere fullstendig kunnskapsbasert, grunngir Vaagan.

Unge Venstre var for å behalde Skarnes vgs. og legge ned Gausdal vgs., da Venstre hadde gruppemøte om saka, ifølge Vaagan.

– I gruppemøtet så støtta dei ikkje å legge ned Skarnes. Vi fekk ikkje noko godt svar på kvifor, seier Vaagan.

Redd for framtida til Innlandet

Etter møtet med Unge Venstre-leiaren tek NRK kontakt igjen for å spørje om dei kjempa for å behalde Skarnes vgs. i dette gruppemøtet.

Omar Svendsen-Yagci svarar på tekstmelding at «Unge Venstre har ikkje vedtak på enkeltskuler». Han står fast med at «vi må ha politikarar som tørr å gjere tøffe val (...), sjølv om dei ikkje alltid er populære».

– Men eg personleg meiner det var fornuftig å legge ned Skarnes, skriv Svendsen Yagci.

Unge Venstre-leiaren trur er redd for framtida til Innlandet, om ein ikkje vel velannarleannleistriktspolitikken.

– Eg elskar Innlandet, og eg er opptatt av at alle dei regionane vi har her skal vokse. Da trur eg at det verste vi kan gjere er å alltid jakte etter fortida. Ellers fryktar eg at Innlandet blir ein stad der ingen ønsker å bu lenger når eg blir vaksen.

– Eg ønsker eit sterkt Innlandet med sterke regioner, seier den ferske Unge Venste-Venstren frå Gjøvik.