Nordmann dømd til Finland si strengaste straff for drapet på Janne Puhakka

13. oktober i fjor skaut og drap Rolf Nordmo sin tidlegare kjærast, Janne Puhakka, i deira felles heim i Esbo i Finland.

No er Nordmo dømd til «livstid» i fengsel – Finland si strengaste straff. Det tilsvarar å bli dømd til 12 år forvaring i Noreg.

Det melder den finske avisa Helsingin Sanomat.

I dommen frå Västra Nylands tingrett er Nordmo dømdt for overlagt drap.

66-åringen innrømte i retten å ha drepe Puhakka, men nektar for at det var planlagt.

Puhakka var ein kjent finsk ishockeyspelar, sett på som eit førebilete for å vere den første opne homofile mannen i sporten.

Sende meldingar om å skyte Puhakka

I rettssaka mot nordmannen blei det vist bilete av meldingar som Nordmo sende til ein ven kort tid før drapet.

To veker før Nordmo drap ekskjærasten sin sende han ei melding til venen at han var «blenda av kjærleik».

Vidare skreiv nordmannen at han «tenker på å ta opp ei hagle og skyte både Puhakka og den nye kjærasten hans i senga midt på natta», refererer Yle frå retten

Så, elleve dagar før drapet, skal Nordmo ha skrevet ei oppdikta overskrift i den finske avisa Helsingin Sanomat:

«Ein frustrert nordmann skaut og drap to uskuldige finnar i badstova deira.»

– Meldingane viser at ideen om å skyte ikkje oppstod plutseleg, seier aktor Annukka Juntunen til Iltalehti.

I etterforskingsrapporten står det at Nordmo var opphengt i tanken på å skyte dei to.

– Det skjedde noko i hjernen min

Sjølv meiner Nordmo at meldingane berre var tull og at han ikkje i sin «normale tilstand kunne ha drepe nokon».

Men den 13. oktober i fjor drap han ekskjærasten sin.

I retten forklarte Nordmo at han hadde ein «tom følelse» men at han hugsar lite frå denne dagen.

– Det skjedde noko i hjernen min. Eg veit ikkje om eg eksploderte utvendig eller kollapsa innvendig.

Motivet skal ha vore samlivsbrot og at Puhakka hadde møtt ein annan.

66-åringen fortalde også om økonomiske problem og ein periode prega av stress og uro.

– Det er utruleg kor raskt korthuset begynner å kollapse.

– Kan ein trekke den konklusjonen at Puhakka også var redd for deg?, spurde ein av bistandsadvokatane i retten.

– Absolutt ikkje, svara Nordmo.

Nordmannen sin forsvarar, Ville Luoto, visar til at Nordmo aldri har vore aggressiv eller valdeleg.

– Det er ikkje hevda at det å gje bakgrunn ville gjere handlinga eller forståeleg. Det er gjort eit forsøk på å synleggjere omstenda som førte til den såkalla blackouten 13. oktober, sa Luoto i retten.

I retten fekk Nordmo spørsmål om han angrar.

– Eg er frykteleg lei meg og angrar på det, svarar nordmannen.