Netanyahu ber libanesiske mødrer og fedrar «redde Libanon»

Samtidig som at Israel bombar Libanons hovudstad og nærare ein fjerdedel av landet er på flukt, prøver den israelske statsministeren Benjamin Netanyahu å fri til libanesiske mødrer og fedrar.

– Stå opp og ta tilbake landet ditt, seier han.

Netanyahu kallar situasjonen for ein «unik sjanse» for folket til å fjerne Hizbollah.

Hizbollah har ein militær og politisk fløy, og har både motstandardar og tilhengarar i folket.

Det er i hovudsak den sjiamuslimske befolkninga som støttar Hizbollah.

– Her har nok Netanyahu sett ei mogleg splitting i den libanesiske befolkninga og forsøkt å borre djupare inn i den, seier fredsforskar og tidlegare Prio-direktør Kristian Berg Harpviken.

– Han snakkar nok til mange, men Netanyahus popularitet er avgrensa.

Harpviken seier at libanesarar flest no er livredde for dei israelske angrepa i Libanon, og trur ikkje at talen treff så djupt.

– Skepsisen mot Hizbollah utover den sjiamuslimske befolkninga er allereie stor, men frykta for Israels militærbruk vil nok overskygge dette.

Ein stat i staten

Ifølge Harpviken har Hizbollah fått motstandardar innad i Libanon som følge av gruppas støtte til regimet i Syria under borgarkrigen i landet.

EU har terrorlista den militære delen av gruppa.

Men Hizbollah har også stor politisk innflytelse og legitimitet i Libanon, og blir sett på som ein stat i staten.

Gruppa er djupt religiøs, men støttar eit sekterisk og multireligiøst Libanon.

Det israelske forsvaret (IDF) har ikkje gått ut med tal over kor mange soldatar dei har sendt over grensa. Men Politico og andre internasjonale medium estimerer at det dreier seg om over 15.000 soldatar.

Tysdag utvida Israel militæroperasjonane frå sørlege Libanon, til sørvestlege Libanon. Netanyahu meiner derimot at libanesarane sjølv bør redde Libanon ved å bli med på å fjerne Hizbollah.

– Dette er ein moglegheit til å redde Libanon før landet fell ned i avgrunnen av ein lang krig som vil føre til øydelegging og liding, slik vi ser i Gaza, seier Netanyahu.

Etter eitt år med krig på Gazastripa har over 41.000 palestinarar blitt drepne.

Situasjonen for palestinarane er heilt desperat, og det humanitære støttesystemet er på randa av total kollaps.

1,2 millionar fordrivne

Hizbollah og Hamas er allierte i deira kamp mot Israels okkupasjon av palestinske område.

Hizbollah har angripe Nord-Israel dagleg sidan 8. oktober i fjor, og seier at dei vil halde fram så lenge det er krig på Gazastripa.

Det har ført til at om lag 60.000 israelarar har måtta evakuert heimane sine i nord. Det er grunngivinga til dei israelske militæroperasjonane i Libanon.

Samtidig har om lag 1,2 millionar libanesarar blitt fordrivne frå heimane som følge av Israels angrep og evakueringsordrar i Libanon.

Det er nesten ein fjerdedel av alle som bur i landet.

Israel har målretta angrep mot bydelen Dahieh i Beirut. Dette er område der Hizbollah residerer. Men det er også eit tett befolka område.

Skuldar på Iran

Netanyahu brukte også ein del av den tre minutt lange talen til å snakke om erkerivalen i regionen, Iran.

– Israel gjekk ut av Libanon 25 år sidan. Men landet som eigentleg erobra Libanon, er ikkje Israel. Det er Iran, seier Netanyahu.

Israel okkuperte libanesiske område frå 1982 til 2000, og opprettinga av Hizbollah blir sett på som eit direkte resultat av Israels okkupasjon, med mål om å kjempe imot Israel.

Hizbollah er støtta av Iran.

1200 drepne

Ifølge libanesiske helsemyndigheiter er minst 1200 personar drepne i Libanon i løpet av dei siste vekene, skriv Al Jazeera. Det blir ikkje skilt mellom sivile og militære, men 127 av dei drepne skal vere barn.

Verdas matvareprogram (WFP) har uttrykt bekymring over matsikkerheiten i landet etter at jordbruksområde har blitt ramma i israelske angrep.

Minst 46.000 bønder er evakuerte frå landa sine og store område med dyrkbar jord har blitt brent i Sør-Libanon, seier landdirektør i WFP Matthew Hollingworth.

I slutten av september blei Hizbollah-leiar Hassan Nasrallah drepen i eit israelsk angrep.

Netanyahu hevdar den moglege arvtakaren Hashem Safieddine også er drepen. Det er ikkje bekrefta av verken Hizbollah eller Det israelske forsvaret.