Mexicos ambassadør seier dei er i Northug-samtalar: – Kven vil ikkje sjå han i OL?

Ein plass for Noreg ser vanskeleg ut for Petter Northug i OL i Milano/Cortina i 2026. Derfor har det vore spekulert rundt om andre nasjonar kan tilby Northug ein plass.

Den mexicanske ambassaden i Noreg stadfester no til NRK at det er ein pågåande dialog mellom partane.

– Han har ein positiv relasjon til Mexico og me diskuterer for augeblikket fleire ting, uttaler Mexicos ambassadør Omar Fayad til NRK.

Får snart OL-svar

Northug avslutta sesongen med NM på Hovden i helga som var. Der fortalde han at det går mot ein ordentleg seriøs satsing inn mot ny sesong.

Han fortalde også at det vil kome eit utsegn om OL om ikkje lenge.

– Eg kan ikkje seie noko om OL no. Det blir jobba litt i kulissane, så veit me meir i midten av april. Då blir det ein retning på kor eg går inn mot ein ny sesong, sa Northug.

Den mexicanske ambassaden er tilsynelatande svært interessert i å få Northug med på laget.

– Kven har vel ikkje lyst til å sjå Mr. Northug kome tilbake i VM, eller til og med konkurrere i OL? Me vil gjere alt som er mogleg for at hans erfaring kan hjelpe dei mexicanske utøvarane som har sikra seg ein plass i vinter-OL i 2026 i Italia, skriv ambassadør Fayad.

– Kjem tilbake når me har meir informasjon, skriv Northug kryptisk i ein SMS til NRK.

På spørsmål om han kan bekrefte samtalar med Mexico, svarer han:

– Ikkje noko å bry seg om.

Northug har tidlegare uttalt at eit nasjonsbytte er aktuelt for å kunne gå OL. I november uttalte han at Liechtenstein var ein moglegheit. I desember stadfesta han at det var samtaler med Austerrike.

Enn så lenge har det ikkje vore nokon uttalt utvikling på saka.

Trente med mexicansk utøvar

Ein som med stort sannsyn skal til OL er mexicanske Allan Corona Rodriguez. Han har vore busett i Noreg dei siste fire åra og kvalifiserte seg til OL gjennom kvalifiseringsrennet i VM.

Han fortel til NRK at han og Northug trente saman i Holmenkollen for nokre veker sidan.

– Eg veit det er ein potensiell moglegheit for det meksikanske laget. Men det er veldig kompliserte saker, med pass og liknande. Er det tid, så er det

moglegheiter, seier Rodriguez.

Han fortel vidare at dei ikkje spesifikt snakka om eit nasjonsbytte, men at dei la andre planar saman.

– Me har snakka om moglegheita for å trene saman i Mexico, da mest sannsynleg i sommar. Me snakka om at det ville vore ekstremt kult og ein moglegheit for å bringe langrenn til landet. Det er ikkje noko planlagt, berre prat mellom to som likar å drøyme, seier han.

Fullt mogleg med nasjonsbytte

Advokat Mathias Lilleengen er valdgiftsdommar i idrettens internasjonale Valdgiftsdomstol (CAS).

Han peikar på at det ikkje er noko som tilseier at det bør vere problematisk for Northug å gå for ein annan nasjon viss ein ser på OLs regelverk.

– Som regel har dei fleste land høve til å gi statsborgarskap basert på butid, ekteskap eller «kulturell integrering». Den siste bolken omfattar idrettsutøvarar, seier Lilleengen.

Sjølv om ein får statsborgarskap frå ein annan nasjon må ein også oppfylle OLs regelverk for å kunne delta.

Northug gjekk offisielt sett for Noreg for siste gong for sju år sidan. I desember 2018 valde han å legge opp. Lilleengen peikar derfor på at han er godt innanfor regelverket for å representere eit anna land.

– I regelverket er det eigne vedtak for utøvarar som allereie har deltatt for eit anna land i OL. Dei må som hovudregel vente med å delta for «nytt» land i 3 år frå dei siste representerte det «gamle» landet sitt.

Mogleg FIS-trøbbel

Regelverket til Det internasjonal skiforbundet er hakket strengare. VG skreiv i januar om at Northug ikkje oppfyller kriteria til FIS når det gjeld nasjonsbytte. Dei har nemleg reglar på at ein må ha budd i sitt nye land i minst to år før ein sender inn søknaden.

Håpet for Northug er at det finst eit smotthol. Viss Northug kan dokumentere at det finst «ekstraordinære omstende» for nasjonsbytte har FIS moglegheit til å vise skjønn.

Til VG fortalde generalsekretær i FIS, Michel Vion, at eit slik løyve aldri har blitt gitt ut før.